1815/2026-2027

Dated: Mamit the 15th of August, 2026 : Vawiin khan ramchhung hmundangte rualin India Independence Day vawi 80-na chu GSA Playground, Mamit-ah hman a ni a, Pu PC. Vanlalruata, Minister, A&FW/IWRD/Cooperation chu khuallian niin hnam puanzar a pawtpharh a; parade contingents 14-te hnam puanzar chibai buk a chhanglet a ni.

Khuallian chuan Independence Day hmang tura kalkhawm sawrkar hnathawk te, khawtlang hruaitu te, tlawmngai pawl hruaitu hrang hrang te, zirlai te leh mipuite chibai a buk a. India ram chu British Sawrkar atanga kan zalen hnuah South Asia khawmualpuiah chuan ram thang chak ber kan lo ni chho ta a. Khawvel pumpui ang pawhin democracy ram hlawhtling ber te zinga mi kan ni, a ti a. Kan thenawm ramte dinhmun ngaihtuahin kan vannei hle a, India ram zalen takah Mizoram pawh state ralmuang ber an tih hial hmunah kan cheng mek a ni, a ti.

Mamit District chu Sawrkar Laipuiin Aspirational District tia duhsak taka a enkawl mek kan ni a, Mizoram tan hian kan pawimawh em em a ni, a ti a. Sawrkar Laipuiin Vikshit Bharat 2047 a kalpui mekah kum 2047-ah chuan ram changkang zawk, developed country ni phak tawh turin Sawrkar chuan tan a la mek a, Mizoram pawhin ke kan pen chho ve mek zel a ni. Chutiang karah chuan Mamit District agriculture potential nei tha em em kan ni a, Aspirational District kan nih avangin district dangin an neih ve loh hamthatna tam tak kan neih te hmang tangkaiin Mamit District mipui te Mizoram tana entawntlak district kan nih theih nan mahni phak tawkah theuh theihtawp chhuah turin a fuih a ni.

Mizoram Sawrkar chuan kut hnathawktute hmakhua ngaiin, state flagship programme Bana Kaih (Handholding Policy) hnuaiah sawhthing lei mek niin, Mamit District bikah pawh sawhthing hi quintal 7,332 (sang sarih zathum sawmthum pahnih) chuang hralh tawh niin, cheng 3,66,62,500/- chuang sawhthing chingtute’n tun kum chhung hian an lalut tawh a ni. Oil Palm lamah pawh Mamit District kan duai lo hle a, Oil Palm rah metric ton 125 chuang Godrej Agrovet hnenah hralh niin, cheng 1,96,27,775 chu Oil Palm chingtute’n an dawng tawh a ni.

Minister chuan Mamit District chhunga hmasawnna hnathawh hrang hrang tlangpui a tarlang a. Mamit bikah chuan NABARD RIDF hnuaiah Tuidai Multipurpose Project kalpui mek a ni a. Project cost pawh vaibelchhe 29.4 lai a ni. Mamit District chu irrigation ah leh wet rice cultivation lamah potential a that avangin Mamit-ah Irrigation Water Resources Division a awm theih nan Sawrkarah proposal thehluh mek a ni. Darlakah cheng vaibelchhe 48 senga Water Resources Project kalpui tum a ni bawk. Mamit District chhungah Cooperation Department lamah hmalak chhoh mek zel a ni a, Multipurpose Primary Agriculture Credit Society (MPACS) hmanga hnathawk mek pahnih awm tawhin pariatte pawh computerize tura hmalak mek a ni a, District chhungah MPACS hi 31 din tum a ni.World’s Largest Grain Storage Plan in Cooperation Sector Scheme hnuaiah Mamit District-ah Godown sa turin ruahmanna siam a ni bawk.

DC Office atang hian Aspirational District Programme (ADP) hnuaiah Health & Nutrition, Education, Agriculture & Water Resources, Basic Infrastructure leh Financial Printer & Smart Board) 50 semchhuah tawh a ni. Inclusion & Skill Development kawngah te project hrang hrang kalpui mek a ni a, kum 2025 3rd Quarter chhungah bik khan, India rama Aspirational District zingah Health & Nutrition lama titha ber an ni nghe nghe. ADP hnuaiah hian turmeric processing unit, vaibelchhe thum man tur chu Reiek-ah din tura hmalak mek a ni a, GSA playground artificial turf phahna tur pawh plan of action siam fel niin, empowered committee-in a pawm tawh a ni. Mamit Vikas Bhavan sakna tur plan of action pawh pawm fel a ni tawh bawk.

Mamit Police te chuan tun kum chhung hian Heroin gram 342 an man tawh a, hei hi nuai sawmruk pariat sing nga sang hnih zali sawmkua man hu a ni. Heng bakah hian methamphetamine gram 1,887, nuai sawm hnih pali sing nga leh sang sarih man hu leh, rakzu litre 789, nuai li sang khat za sarih leh sawmnga man hu an man tawh bawk.

Health & Family Welfare hnuaiah hian District Hospital bakah PHC zawng zawng te chu National Quality Assurance Standard certified an ni tawh a, CHC pawh NQAS certification nei turin hmalak mek a ni. School Education hnuaiah hian GC High School, W. Phaileng leh Dapchhuah Middle School-te chu Sawrkar school-ah hlân kai an ni a; District chhunga sikul hrang hrangah Computer, Printer leh Smart Board 50 semchhuah tawh a ni bawk.

Local Administration hnuaiah Mamit District Village Council 56 te hnenah Computer leh Printer set khat theuh sem a ni a, New Mamit-ah cheng nuai sawm hnih sengin Panchayat Bhavan sak a ni bawk.

Rural Development hnuaiah hian Mamit District huam chhungah Job Card 23,920 a awm mek a, MGNREGA ni thin kha tunah chuan VB G RAM G tih a lo ni taa, kum khat chhungin inhlawhna ni 125 a awm tawh dawn a ni.

Power & Electricity Department lam pawhin theihtawp an chhuah zel a, 33 KV Line West Phaileng-in Rawpuichhip a pekna line hun engemaw chen nung tawh lo chu hman theiha peihfel a ni a, Dampui Power pekna 11 KV line kawnghluia kal enkawl harsa tak thin chu kawngpui dungah sawn fel a ni. Hun rei tak 132 KV line 33 KV-a charge tawh chu 132 KV-a charge theih tura peihfel a ni bawk.

Land Revenue & Settlement Department chuan tun sawrkar kum kallai mekah hian Revenue Tax atangin cheng 35,74,216/- an hmu a, Non-Tax atangin cheng 5,46,028/- an hmu tawh bawk.

Taxation Department, Mamit Zone chuan tun sawrkar kum chhung hian chhiah chi hrang hrang atangin cheng 2,24,35,771/- hmuh tawh a ni. District Child Protection Unit Foster Care hnuaiah hian naupang 2 an awm mek a, sponsorship programme atangin naupang harsa 148 hnenah thla tin cheng 4,000 an pe thin bawk a ni.

PWD Mamit Division hian kawng kilometer 273-a thui an enkawl mek a, NABARD hnuaia thawh “Strengthening and Improvement of W. Phaileng to Marpara” KM 80-a thui chu thawh zawh tawh a ni. Food, Civil Supplies & Consumer Affairs Department chuan NABARD Warehouse Infrastructure Fund kaltlangin buhfai dahna tur Godown leh Staff Quarters tur, Kanhmun Centre, Zawlnuam Centre, Phuldungsei Centre leh Marpara Centre-ah te sa zo tawhin, luahfel vek tawh a ni.

Excise & Narcotics Department te chuan tun sawrkar kum chhungin Narcotic Drugs & Psychotropic Substances Act 1985 (Drugs) hnuaiah dan bawhchhia mi 26 an man tawh a, case 18 ziahluh a ni. The Mizoram Liquor Prohibition Act 2019 hnuaiah dan bawhchhia mi 239-man tawh niin case 316 ziah luh a ni.

AH & Vety Department hnuaiah Free Animal Health Camp leh Awareness Programme hrang hrang 15 neih a ni tawh a, National Livestock Mission hnuaiah vawk 237 insured tawh niin hei hian vawk vulh tute tan financial security pe-in nasa leh zuala vawk vulh lama tan la turin phurna nasa tak a pe a ni.

District Transport Office chuan tun sawrkar kum chhungin Lirthei 566 a register tawh a, Tax chi hrang hranga Revenue lut zat hi cheng 1,19,02,515 a ni.

Pu P.C Vanlalruata chuan vawiin hian Sawrkarin mipui atana hna a thawhte kan tarlang seng dawn lo tiin hmasawnna tluantling nei thei turin Sawrkar ringawta innghat mai lovin, mahni zawn ṭheuhvah taimakna thar nen pen chhuaka, mi dangte tana entawn tlak leh khawtlang tana mi ṭangkai ni turin, ram leh hnam tana kan theih tawk theuha tan la thar turin a sawm a ni.

Vawiin India Independence Day, 2026 hmannaah hian Armed contingent pakhat, Unarmed contingent pali leh School Contigent pakua awmin, Parade Commander hi Sub Inspector Lalroliana, 4th IR Bn. a ni a; 2nd Commander hi Sub Inspector C. Lalthangzuala, 4th IR Bn a ni. Kalrem music hi Govt. Mamit High School pipe band te’n an tum a ni.

School contingents-ah hian pakhatna Presbyterian English School Girls niin,pahnihna Govt Agape Middle School an ni a, pathumna hi Hmunsam Public School te an ni. Un-Armed Contingents-ah pakhatna Govt. Mamit College I Mizo Bn. NCC niin pahnihna Govt. Mamit High School I Mizo Bn. NCC te niin pathumna hi St. Francis of Assisi School I Mizo Bn. NCC te an ni.

Independence Day pual hian Sport items hrang hrang Football, Volleyball, Badminton leh items dangah te tournament buatsaih a ni bawk.

Kumin Independence Day lawmnaah hian Mamit District atanga chawimawina dawngte chanchin chhiarchhuah a ni a. Inspector Fredy Lalramthara’n Governor’s Gold Medal a dawng a. District leh State Level Teachers Award chawimawina Pu Lalrinmawia Pachuau, Headmaster PM Shri, Govt. Kawrthah PS I chuan a dawng bawk a ni.