Vawiin khan ram chhung hmun dangte rual in GSA Playground Mamitah India Republic Day vawi 68-na ropui taka hman a ni a, Pi Lalbiaksangi, Mamit District Bawrhsap chuan khuallian niin India hnam puanzar a pawt pharh a, Parade Contingent 17 te India Hnam puanzar chibai buk a chhanglet a ni.

Khuallian Pi Lalbiaksangi, Mamit District Bawrhsap chuan "India danpui duang chhuaktute leh Kum 67 chhung India ram min hruaitute zahna chibai kan buk a ni" a ti. Mamit District chhunga sawrkar Department hrang hrangte hmalakna sawiin Border Area Development Programme hnuaiah hmasawnna hrang hrang thawh mek a nih thu a sawi a,Sawrkar laipui leh State sawrkar hmalakna in Tripura atanga Reang (Bru) hruaikir turte endik hna chu Ni 2 atanga 23 November 2016 chhung khan hlawhtling taka neih a ni a, chhungkua 4199 endik an ni a, heng chhungkuate hi khaw thlan bik 48 ah dah tura ruahmanna kalpui a nih thu a sawi.Mamit District chhunga Thalai rual, sipai tan tum mi 29 hnenah Pre-Recruitment Training buatsaih a nih thu sawiin heng zinga mi pahnih Sipai atan lak an ni chu lawmawm a tih thu a sawi bawk.

Khuallian chuan "PWD hnuaiah Mamit District chhunga kawngpui tha zawk a awm theih nan hmalak mek a ni a, National Highway 44A Double Lane siam hna chak taka kalpui zel a ni tiin,Tut Lui chunga Lei dawh hna zawhfel tawh niin Bairabi kaia Tlawng Lei dawh hna pawh kumin chhunga siam zawh hman ngei tuma hmalak mek a nih thu a sawi.December 2016 chhung khan Agriculture Department hmalakna hnuaiah Oil Palm 2269.213MT hralh chhuah a ni a,Rs 1,24,80,671 lai hmuhchhuah a ni" a ti a, "Rural Development hmalakna in MGNREGA hnuaiah chhungkua 20537 Job Card siamsak an ni a,Job Card neitute hi ni 14 chhung inhlawhna siamsak an ni tawh tih a sawi a, Health Department hmalakna in Mamit District pumah TB vei mi 24 hmuhchhuah an ni a, heng zinga zaa 95 tihdam an ni. Mi 27009 thisen endik zinga 1677 chu Malaria hrik pai an ni tih finfiah a ni a, a thlawnin damdawi pek vek an ni a, Malaria avanga thi an awm lo" a ti bawk.

Mamit a India Republic Day lawmna ah hian a vawi khatna atan Mamit khawpui chhunga sawrkar Department hrang hrang 10 te chuan an hmalakna leh hnathawhte Tableau hmangin kalkhawm mipuite an entir a ni.

India Republic Day Lawmna Mamit GSA Playground a neih ah hian Armed contingent 1 leh un-armed contingent 15, leh MZP Mamit Hqrs Pipe Band te an tel a, an vaiin Parade contingents 17 an tel a ni. Parate Commander hi Inspector Lalthansanga, a ni a, 2nd Commander hi Inspector R. Lalrinngeta, a ni. School contingents ah hian lawmman pakhatna Presbyterian English School Girls niin pahnihna hi St Francis Of Assisi girls an ni, lawmman pathumna hi JNV School ten an la a ni. heng bakah hian khuallian chuan Mamit khawpui chhunga Department 10 (sawm) tableau entir tute hnenah Participation lawmman a hlan nghal bawk.

Sawrkar Department thenkhat Mizoram Excise & Narcotics Department, Taxation Department, Land Revnue & Settlement Department, Economics & Statistics Department , leh Power & Electricity Department ten a an hmalakna tanga an sum thawhchhuah zat a tarlang bawk.

India Republic Day lawmna hun hman zawh a nih hnu hian Khuallian Pi Lalbiaksangi, District Bawrhsap chuan Mamit District Hospital,Shelter Home, Little Angle Children's Home leh Mamit District Jail tlawhin thilpek a hlan a ni.

Chhun dar 12:30 ah sawm bikte pualin DC, Office Complex ah At Home buatsaih a ni