Ram chhung hmung dangte rualin Hnahthial-ah pawh tukin zing dar 10:30 khan HBSC Ground No-I-ah Republic Day Vawi 67 na chu ropui taka lawm a ni a, Pi Lalhruaitluangi, MCS, SDO (C) & BDO chu khuallian niin Hnam Puanzar a pawt pharh a, School naupang parade contingents 12 te Hnam Puanzar chibai buk a chhang let bawk a ni.

India ramin mahni a ro in relna a neih champha vawi 67 na hmang tura kal khawmte chibai bukin Khuallian Pi Lalhruaitluangi chuan he hun lawmawm Hnam Puanzar - dikna, beiseina leh hmasawnna lantirtu chibai buk ni-ah hian kan ramin mahni a ro in relna a neihna atana thawktu, mi huaisente, martarte leh hruaitu ropui tak tak mual liam tawh zawng zawngte hre reng in zahna chibai buk thar leh turin a sawm a, kum 200 chuang sap ho awpbehna hnuaiah ram mipuite sakhua leh tawng hmangin thendarh a ni a. Ram hausa leh intodelh ni thin kha lo hnufual hman hle a. Zalenna nei tura thisen leh nunna tamtak seng a hruaitu hmasa ten an lo sual chhuah hi ven him a, mahni a ro in rel a zalen tak a awm a hma sawn zel theih nan a thawh tlan dial dial hi mitin mawhphurhna a nih zia hriat thar leh a tul thu a sawi.

SDO (C) chuan mahni a ro inrel hrang a kum 60 chuang zet a kal hnu-ah ram hruaitu ropui tak tak te finna leh remhriatna avang te leh an inpekna avangin India ram chu khawvel hriat tham a ram ropui leh hausa a lo ni ve ta reng mai a. India ram, Democracy lian ber leh mihring tam zawng a teh pawh a khawvel a pahnihna tling phak chhungah Mizoram ngei pawh kum 20 chhung rambuai nih hnuin tunah chuan remna leh muanna tluantling nei a India ram state dangte rual a ke pen ve thei turin chak takin hmasawnna kawng zawhin a kal mekah hian ram leh mipui tana sorkar hmalakna tam tak zingah ram chhunga ei leh bar zawnna kawngah miten lei rem an rah ve nan tiin NLUP sem a ni a. Hnahthial bial chhungah mi tam takin an dawng tawh a ni tiin Hnahthial bial chhung hmasawnna hrang hrang hriselna dinhmun te, RD. Department hmalakna te, ICDS, SDEO hnuaia zirna dinhmun te, P&E, Forest, Agriculture, KVK, PWD, PHE leh AH & Vety hma lakna te a tarlang a ni.

India in mahni-a ro a inrel a lo thlen champha lawmna niah hian ram leh khawtlang in hmasawnna duhawm tak a lo neih nan leh inuaunate leh in thian thatnate a lo ngheh zel theih nan, remna leh muanna vawng nung chunga rinawmna leh inpekna thuk zawk neih theihna tura inhlan thar theuh a, khua leh tui tha ni zel mi tin a sawm in a ngen a ni.

School naupang parade contingents 12 inlan zingah 1-na Mantawni Memorial English School, 2-na St. Stephen School leh 3-na Sapzari Memorial School te niin he hunah hian Hnahthial Officers' Club te, Hnahthial tihmingthatu mi 4, an chawimawi a, K. Lalthianghlimi'n zaia kal khawmte a awih bakah ECS School in Cheraw an entir bawk a ni.

Attachment

  • Loading attachment...