Vawiin khan India Republic Day vawi 68-na chu Lawngtlai CYLA khelmualah ropui taka lawm a ni a. Lawngtlai Bawrhsap Dr A. Muthamma IAS chu Khuallian a ni.

Zing ni chhuah rualin sawrkar pisa leh hmun pawimawh dangah te India hnam puanzar zar a ni a. Chawhma dar 10:30-ah CYLA Playground-ah Khuallianin hnam puanzar pawt pharhin, hnam puanzar chibai buktu parade contingent 24 te chibai buk a chhang let nghal bawk.

Khuallian Dr A. Muthamma chuan Lawngtlai District mipuite chu Republic Day chibai bukin, India ram Danpui duang chhuaktu ram hruaitu hmasate zahna chibai a buk bawk a. Lawngtlai District chhunga hmasawnna hna thawh hrang hrang tarlangin, NLUP atangin Lawngtlai District chhungah chhungkaw 12000 chuang hnenah tanpuina sem a nih tawh thu te, MGNREGA hnuaiah job card nei chhungkaw 28156 an awm mek thu te, District Hospital building thar sak tum mek a nih thu leh chumi chhung atan OPD building tharah an insuan luh thu te a sawi a. Hospital-a nausen damlo enkawlna SNCU hawn a nih thu leh nurse zirna ANM School pawh kumin atanga tan tur a nih thu sawiin, naupang sikul chawlhsan tawhte tana chen chilha zirna hmun (residential special training centre) panga hawn tura ruahman a nih thu leh MsDP hnuaia ITI sak tawh pawh kalpui tan thuai tum a nih thu a sawi bawk.

Greater Lawngtlai Water Supply Scheme hawn a nih tawh thu sawiin, Khuallian chuan Kaladan Multi Modal Transit Transport Project kawng laih hna pawh zaa sawmruk (60%) chuang thawh zawh a nih tawh thu a sawi a. PWD (Building) hnuaia Govt Lawngtlai College, Lawngtlai Polytechnic, DIET leh Longpuighat PHC building sak mek a nih thu te, LADC hnuaiah Lawngtlai khawpui chei that hna leh Aizawla Lai Students’ Hostel sak hna thawh mek a nih thu leh Lawngtlai khawpui helna kawng (by-pass road) sial mek a nih thu te a sawi. Khuallian hian Mampui AH & Vety Farm-a ar, vawk leh bawng vulhna hmun hawn thar a nih thu a sawi bakah, PMAY-G, PMKSY, MsDP, BADP leh Swachh Bharat Mission hnuaia Lawngtlai District hmasawnna hna thawk hrang hrang a tarlang a ni.

Thu a sawi zawh hian Khuallian chuan lawmman hrang hrang a sem nghal a. Republic Day parade-a unarmed contingent-ah Downtown English Medium School Scouts & Guides chu pakhatna niin, pahnihna Govt Model English School Guides leh pathumna Don Bosco School Scouts & Guides Senior te an ni a. School contingent-ah Don Bosco School Girls chu pakhatna niin, pahnihna Govt Region Higher Secondary School Girls leh pathumna Jehova Jire Higher Secondary School Girls te an ni. He'ng bakah hian parade endiktu (judge)-te, parade commander-te, Mizoram Police armed contingent te, SSA Pipe Band te leh parde contingent dang zawng hnenah lawmman pek a ni bawk.

Republic Day vawi 68-na puala buatsaih Volleyball Running Trophy mipaah Kolodyne (Paithar) chu pakhatna niin, hmeichhiaah Sihtlangpui chu pakhatna an ni a. Best player mipaah Lalzarzova (Sihtlangpui) thlan niin, hmeichhiaah Lalbiakngheti (Sihtlangpui) thlan a ni.

Repubic Day Badminton Tournament 2017-ah mipa singles-ah Johnny L.Zosangliana champion-in, mipa doubles-ah Johnny L.Zosangliana leh Joseph Lalrinzuala te inkawp an champion a. Mipa kum 35 chung lamah N.Lalramriliana leh C.Malsawmtluanga te chak berin, hmeichhe doubles-ah Dr Malsawmtluangi Ralte leh N.Lalrimawii te inkawp an champion a. Special category-ah Lalsawmliana Sailo leh H.Lalhmachhuana te champion-in, ‘B’ doubles-ah Fc.Hrangena leh Hrangthanngura te an champion a. Elis P. Tombing chu Best Official 2016-17 atan thlan a ni bawk.

Republic Day puala Health Worker Award siamah, Vathuampui Health Worker V. Biaknemi chu thawk tha berah thlan niin, Vengpui Sub-Centre chu centre tha berah thlan a ni a. RKVY hnuaia vawk vulhtu Duhsanga (Saikah) leh NLUP atanga bawng vulhtu Renchiaii te hnenah Republic Day Farmer’s Award hlan a ni a. India President hnen atanga huaisen lawmman dawngtu Churchill Sathing hnenah Khuallian hian lawmman a hlan bawk.

Republic Day 2017 pual hian Lawngtlaia damdawi in pathum District Hospital, Christian Hospital leh Lairam Christian Medical Centre te bakah, Lairam Motherless Home leh District Jail-ah te Rs 2000/- theuh pek an ni a. Hemi rual hian parade commander SI Tlircheuva leh SI Lalramngahaka Renthlei te’n an lawmman dawn Lairam Motherless Home tana an hlan chu pek nghal a ni.

CYLA Playground-a Republic Day lawmna hman zawh hian Lawngtlai DC Bungalow tualah VIP At Home Tea Party hlimawm tak hman chhunzawm a ni.

Vawiin Lawngtlaia Republic Day lawmnaah hian LADC CEM Pu VL Hmuaka te, Chairman Pu V.Zirsanga te, Lawngtlai SP Pu Lalsanglura te bakah, LADC-a member te, state leh district council-a officer te, NGO leh thu thar theh darhtu te, sikul naupang leh mipui thahnem tak an tel.