3976/2024-2025
Dated: Mamit the 26th of January, 2025 : Vawiin khan India Republic Day vawi 76-na chu GSA Playground, Mamit-ah ropui taka hman a ni a, Pu K.Laltlawmlova, District Bawrhsap chuan hnam puanzar pawtpharhin parade contingents 14 te hnam puanzar chibai buk a chhang let.
Khuallian chuan India Republic Day vawi 76-na lawm tura kalkhawmte chibai bukin, India ramin zalenna a neih theihna tur leh mitin intluktlanna, zalenna, inunauna leh inpumkhatna ram ni tura tha thawhtu ram hruaitu hmasate zahna chibai kan buk thar a ni a ti. Kan ram ro inrelna kalphung leh a hlutnate humhim a, tichaktu ni turin kalkhawmte a sawm a ni.
He ni pawimawh takah hian India ramin kawng hrang hranga hmasawnna hmel a hmuh rualin Mamit District chhungah pawh hmasawnna hmel duhawm tak tak hmuh chhoh mek zel niin, Sawrkar Department - 34 a hmasawnna hna kal mek leh thlen chin hrang hrangte dinhmun a tarlang a. District-in hmasawnna duhawm tak a neih zel theih nana pheikhai rual taka ke pen zel turin District mipuite a sawm bawk a ni.
Vawiin Republic Day lawmna Mamit GSA Playground-a neihah Parade Contingents 14 awmin, school contingents 9, Armed contingents 1 leh unarmed contingent 3 leh Samarga pipe Band 1 te an ni a. Parade Commander hi Inspector K.Vanlalsanga, 4th IR Bn niin 2nd Commander hi Inspector F. Lalhmangaihzuala, 4th IR Bn a ni. School Contingents atangin lawmman pakhatna JNV Boys te'n dawngin pahnihna hi JNV Girls contingents an ni a. Lawmman pathumna hi Presbyterian English School te an ni. Unarmed Contingents-ah pakhatna Mizo Bn. NCC, Govt Mamit College an ni a, pahnihna Mizo Bn. NCC New Diamond School niin pathumna hi Mizo Bn. NCC St. Francis Of Assisi School te an ni.
India Republic Day vawi - 76 lawmna pual hian khuallian Pu K. Laltlawmlova, District Bawrhsap chuan nimin khan Mamit Home hrang hrang, District Hospital leh District Jail-ah te thilpek a lo hlan tawh a ni.
