3977/2024-2025

Khawzawl, dated 26th January 2025: Tukin zing dar 7 khan Mualvawm Playground, Khawzawlah Republic Day vawi 76-na lawm a ni a, Khawzawl DC Pu K. Vanlalthiana khuallian a ni.

Lawmna hun hawn nan khuallian Pu K. Vanlalthiana chuan hnam puanzar a pawt pharh a, parade contingent te chibai bukna a chhang let bawk a ni.

Khuallian Pu K. Vanlalthiana chuan thu sawiin mipui te chibai bukin Republic Day hlim tak leh lawm taka hmang turin duhsakna a hlan a, Republic Day hlutzia sawiin ram hruaitu hlui te'n intluktlanna leh zalenna ram, mi tinin dikna chanvo an neih theihna rama an siam ni a ni tih a sawi. Khawzawl district kum 2019 a din a nih atangin hma a sawn chak hle thu a sawi a, Bana Kaih policy hian department hrang hrang a tihhmasawn thu te, dan leh thupek kenkawh kawnga Police hmalakna chhuanawm zia te, hmasawnna ruhrel lian tham din kawnga hmalakna hrang hrang te, ruihhlo do kawngah Excise and Narcotics Station din thu leh ruahmanna dang te, zirna kawnga Eklavya Model Residential School (EMRS) Prime Minister zahawm takin a din thu leh hmalakna dang te, hmeichhia te hamthatna atana One Stop Centre (OSC) din thu te, khawsakna hmun hrang hrang PMAY hnuaia siam a nih thu te, faina leh thianghlimna kawnga hmasawnna hrang hrang te leh district chhunga hmalakna dang te a sawi a. Republic Day lawmna atana thawktu zawng zawng te chungah lawmthu a sawi a, India danpui Constitution-in min zirtirna te hre reng chunga district hmingthatna leh hmingmawina atan theihtawp chhuah turin mipui te a sawm bawk a ni.

Republic Day lawmnaah hian march past parade awmin contingent sawmpali (14) an lam a, 2nd IR Battalion kaihruaituah an tang a. Contingent titha zual pathum hnenah khuallian Pu K. Vanlalthiana chuan lawmman a sem a, participation prize contingent tin hnenah a sem bawk. Lawmman dawngtute chu hetiang hi an ni:

1st - Far East Experimental School

2nd - Jawahar Navodaya Vidyalaya (JNV), Khawzawl

3rd - St. Joseph School

Republic Day lawmna khar nan Govt. High School, Khawzawl Pipe Band chuan an rimawi hmanrua hmangin India ram hla National Anthem an sa a ni.

He hun hman zawh hian DC Pu K. Vanlalthiana chuan DC Bangla-ah mi sawm bikte hun hlimawm tak a hmanpui bawk a ni.

Republic Day lawmna hunah hian Khawzawl SP Pu F. Lalbiakzauva, Addl. DC Pu Lalfakzuala, office hotute, VC member te, tlawmngai pawl hotute leh MJA member te an lo tel a, school parade contingent te school naupangin an tawiawm bawk a ni.