3978/2024-2025

Dated Serchhip, the 26th January, 2025: Serchhip District ah vawiin khan Republic Day 2024 chu ropui takin lawm a ni a. Serchhip Sports Complex-a Republic Day lawmnaah hian Deputy Commissioner Pu Paul L.Khuma chu khuallian niin parade contingent 13-te hnam puanzar chibai buk a chhang let a ni.

Serchhip DC chuan Republic Day lawmtute chibai bukin Serchhip District-a hmasawnna thleng thenkhat te a sawi a. Serchhip District chu India ram pumah za zela teha ziak leh chhiar thiam tamna ber niin, Government Online Excellence Award - Best Online Initiative ah lawmman pakhatna an dawn thu leh District te inelna Tour Itinerary Creation Competition ah pakhatna an ni, tih a sawi a. District hmasawn chak ber te zinga mi leh kawng tam taka hmahruai mek tu niin sawrkar pawhin Serchhip District mipuite chungah nasa takin rinna a nghat a, chuvangin District mipuite pawhin an tihtur leh mawhphurhnate tha taka hlen zel turin a fuih a ni. 

Bana Kaih - Handholding Scheme chungchangah District Agriculture Marketing Committee, Serchhip District din fel a ni tawh thu te, khaw tinah Society 39 kal tlangin Primary Collection Centre din a nih thu te, Secondary Collection Centre hmun 7 a siam a nih thu te DC chuan a sawi a.  Digital Agriculture Mission hnuaiah Serchhip District chu Drone hmanga Agricultural Land Aerial Survey neih hmasak berna leh enchhina pilot project neihna tura thlan chhuah niin, tunah hian kalpui mek a ni, a ti. DC chuan Health lama hmalakna sawiin District Hospital sak tan mek niin Mizorama a hmasa ber ni turin 3D Dental Laboratory dah a ni, a ti a. National Tobacco Control Programme hnuaiah zirna in 45 chu tobacco free ah puan an nih thu a sawi bawk.

Pu Paul L Khuma chuan Serchhip Division PWD te hmalakna sawiin khaw chhung kawng an chei that bakah sum cheng vaibelchhe 6.37 an hmuh hmangin Serchhip, E.Lungdar, Chhingchhip, Chhiahtlang leh N.Vanlaiphaiah te kawng km 58.46 a thui siam hna an thawk mek, tih a sawi a. Thenzawlah 10MWp Grid connected SPV Power Plant chu Thenzawlah an bun mek te, PHE Department in khawpuiah 292 in leh thingtlangah in 4525 a tui connection an pek thar te, Land Records Digitization kalpui mekah Serchhip District Revenue Department ten 100% an thawh zawh tawh thu te, RD hmalaknain 2023-24 chhunga Serchhip Block chu Best Performing Block ah thlan an nih thu te, ei rawngbawlna gas Serchhip khawpui chhungah home delivery a sem chhuah vek a ni tawh thu te a sawi a ni.

Serchhipa Republic Day lawmna programme-ah hian parade contingent 13 an awm a,  unarmed contingent 4 leh school contingent 9 an awm a ni. Unarmed Contingent ti tha ber lawmman dawngtu chu NCC Army Wing, Govt Serchhip College an ni a. Lawmman pahnihna chu NCC Air Wing, Marian High School ten an dawng a, Little Flower Convent School Scouts and Guides ten lawmman pathumna an dawng a ni. School Contingent zingah pakhatna lawmman dawngtu chu Goodwill English Academy an ni a, pahnihna Brilliant Higher Secondary School niin Chawngbuangi Memorial School ten lawmman pathumna an dawng a ni.

Vawiin hian hna thawh that vanga chawimawina DGP Commendation Award chu Serchhip DEF atangin ASI R Vanlalfinga, ASI Lalchhuanawma Pachuau leh Const. Lalhruaitluanga ten an dawng a. UD& PA buatsaih Fai Inelna lawmman sem a ni bawk a. Lawmman dawngtute chu:

Office: Pakhatna - District Cooperation Office, pahnihna - District Jail, pathumna - PHED (Watsan)

School: Pakhatna- Marian High School, pahnihna - Presbyterian English School, pathumna - Hmar Veng Primary School

Hospital & Health Care: Pakhatna - New Serchhip Health & Wellness Centre, pahnihna - District Hospital, pathumna -Mercy Hospital

Hotel: Pakhatna - Khawtetlang Tourist Lodge, pahnihna - KH Hotel, pathumna - Jamela Hotel.

Volleyball Running Trophy lawmman sem ni bawkin mipaah Chhiahtlang Volleyball Club, hmeichhiaah New Serchhip Volleyball Club ten champion lawmman an dawng a ni. 

India Republic Day lawmna pual hian Serchhip DC chuan Serchhip District Hospital, Mercy Hospital, Unity Orphanage Home, Shalom Special School, Zoar Deprived Children’s Home, Old Age Home, Shakti Sadan, Adult Rehabilitation Centre leh District Jail-ah te thilpek a hlan a ni.