1562/2022-2023
Mamit 11th August,2022 : Vawiin khan DC Conference Hall, Mamit-ah Pu Lalnunhlua, District Bawrhsap hovin Mamit District chhung hmun hrang hranga inkalpawhna kawng dinhmun chungchang sawiho a thutkhawm a ni.

Meeting kaihruaitu Pu Lalnunhlua chuan kalkhawmte chu inkalpawhna chungchangah harsatna a awm reng rengin rang taka District thuneitute hrilhhre thin turin a chah a. District Administration atanga puih theihna awm reng rengah puih an inhuam reng thu a sawi. Tuna District-in harsatna a tawh lian ber, Dampui khaw hnuaia NH 44A kawng ping mek sial tlang tura hnathawh pawh District Administration-in uluk takin a vil reng a, he kawng chungchangah hian harsatna tam tak a awm thu sawiin, tuna mual min avanga kawngpui dan chah mek then hna hi tuna kawngpui siam mektu Ratna Infrastructure Project Private Ltd. te kut anih loh thu sawiin, NH 44A siam mek kawng min thenna tur hi a hranpa a MORTH-ah sum dil ngai a ni a, sum dil ang te hmuh thin anih loh avangin duh angin thenfai ran theih a ni lova, heti chung chung hian Ratna company te hi thenfaitir anih thu a sawi a. NH 44A kawngpui min avanga kum tam tak zawh tawh loh Dampui kawng hlui zawh theiha siam turin District Administration pawhin theihtawpchhuahin SDRF leh fund awm remchang ang ang atangin nuamsa zawka lirthei te'n an zawh theih nan thawmthat hna thawh reng anih thu a sawi. Harsatna hrang hrang kara theihtawpchhuaha hmalak mek anih laiin pawl ang emaw, mimal ang emaw a hmalakna tithuanawp zawng leh, harsatna chinfelna tur ni lemlo, mipuite tana harsatna nasa zawk thlen thei zawnga hmalakna nei lo turin District Bawrhsap chuan mitinte a ngenin a chah nghal bawk.

Meeting-ah hian furpui avanga hmun hranga inkalpawhna kawnga harsatna thleng mekte leh hmalak dan report, a enkawltu Department, Division leh Contractor te atangin ngaihthlak a ni a.
Tun dinhmunah Mamit District-in harsatna a tawh lian ber, NH-44A chainage 58kms a mual tawlhin a siam leimin avanga Dampui khaw hnuaia National Highway kawng ping mek titlang tura hnathawh mek sawiho niin, he kawng enkawltu Ratna Company te hnathawh zel dan tur relho a ni a. Tuna hnathawhna khawl hman mek bakah khawl tam zawk hman belh tura hriattir an ni a, nikhatah darkar 24 hna thawk turin leh Ni 13.08.2022 aia tlai lovah NH-44A kawngpui ping mek chu eng lirthei pawhin a zawh theih tura titlang tura hmala nghal tura hriattir an ni.

Vawiin meeting-ah hian PWD, Kawrthah Division hnuaia Bairabi - Zamuang road thawmthat hna thawh mek chungchang pawh sawiho niin, chak zawka hnathawh a nih theih nan leh, PCC Pavement siam mekte a char hma-a rahchhiat a nih loh nan NH-44A kawng ping tihtlang a nih veleh kawng hi hun engemaw chhung khar lailawk ni se tiin rel a ni bawk.

Meeting-ah hian EE, PWD Mamit Division hnen atanga report ngaihthlak niin, Mamit - Bairabi road kawngpui repair mek chu zawh fel tep niin, reiloteah hna hi zawh theih beisei a ni a, District hmun hrang hranga Mamit Division-in a enkawl zingah tun dinhmunah kawng ping emaw harsatna lian lutuk a awm loh thu ngaihthlak a ni.

Vawiin thutkhawmah hian District Administration a Officer-te, EE, PWD Mamit Division, SDO Kawrthah Division, PWD NH Division I aiawhte leh Ratna Infrastructure Private Ltd. aiawhte an tel a ni.