1561/2022-2023
Siaha, the11th August, 2022: Social Welfare Minister Dr. K. Beichhua chuan vawiin khan Eklavya Model Residential School Noaotla khuaa building sak mekte tlawhin a enfiah.

Noaotla khua VC Court House-a inkhawmna an buatsaihah Dr. K. Beichhua chuan thuchah sawiin, mahni tanghma haina, thawk lova ei tumna hian kan ram a tichhe mek tih sawiin, politics thil tum chu mipui vantlangin kan intawm theih thil kawngpui te, damdawi in te, zirna in te siam a ni, a ti a. Chutiang nei tur chuan sorkar pawhin harsatna hrang hrang karah theihtawp chhuahin hma a la mek zel a ni, a ti.

Dr. Beichhua chuan EMRS School hawn a nih chuan Noaotla leh a chhehvel khua ten Delhi naupang zirlai ang, CBSE course an zir thei dawn a ni, tiin hetianga hmasawnna hi hmasawnna dik politician thalai zawkten kan buaipui mek chu a ni, a ti.

Dr. Beichhua chuan Ruihhlo Do kawngah Mizoram Sorkar chuan theihtawp chhuah tumin a inbuatsaih mek tih sawiin, Chief Minister kaihhruaina hnuaiah Core Committee din a nih tawh thu te, ama kaihhruaina hnuaiah Working Committee an din tawh thu leh District leh Local/Village Level-ah pawh NGO leh VC te kaihhruaina hnuaiah commitee din a nih tur thu a sawi bawk. Noaotla khua chu Ruihhlo Do naah village level-a a bul tan tu ni turin a sawm nghal bawk.

Social Welfare Minister Dr. Beichhua chuan Noaotla EMRS campus bula din tur Centre of Excellence in Sports hmunhma tur a en nghal bawk.

Noaotla lama hun a hman zawhah Dr. Beichhua chuan Siahatlah- Tisopi road-a Siaha Youth Centre a tlawh nghal bawk.

Thalai pungkhawm te hmaa thuchah sawiin, Dr. Beichhua chuan kan thatlai hun chu kan thawh chak lai ber hun a ni, tiin; thatlai huna hnathawh chhinchhiahtlak nei lo chu mi khawngaihthlak an nih thu leh tumruhna leh taimakna nen mahni hmazawna mawhphurhna awmte hlen chhuak zel thei turin a fuih hlawm. Thalaiten donation hmanga SYC centre an din thei chu ropui a tih thu leh he Centre hi thang tharten nakinah a hlut zia an la hmu chho zel dawn a ni, a ti.

Dr. Beichhua hi MADC Chairman Pu N. Viakhu, MADC EM (Sports) Pu St. Vanlalmalsawmliana, Social Welfare Secretary Pu Arun Mishra, Director Pi Zodingpuii leh official dangten an tawiawm a ni.