Vawiin khan I&PR Conference Hall, Mamit-ah International Literacy Day 2019 hman a ni a. Dr. Lalrozama, IAS, District Bawrhsap chuan khuallian niin a hmanpui.

Khuallian chuan zirtirtute chu khawtlang nunkawng siamtu an nih avangin an pawimawh em em a. Hlawh hmuh belh beisei avang leh service record tha duh vang hrim hrim ni lova, kan District-in hmasawnna tluantling kan neih thei nan ziak leh chhiar thiam lo thiamtir-a hmalakna chu a ropui a, a Pathian thu bawk a ni a ti. Kan mihringpuite kan puih theih dan tha ber pakhat chu ziak leh chhiar thiam lote zirtirna pek anih thu sawiin  mahni tawka thutlukna dik siam thei turte, polical decision a ni emaw eizawnna kawng hrim hrimah pawh nise ziak leh chhiar lo ai chuan ziak leh chhiar thiam anih phawt chuan a tan nasa zawkin kawng a awlsam tawh dawn a ni a ti.

Tun dinhmunah Mamit District literacy rate chu 80.35% atanga 83.19% niin ziak leh chhiar thiam lo awm zat hi mipa 2424 leh hmeichhia 5078 an vaiin 7503 an ni mek a. Educational Block wise angin ziak leh chhiar thiam lo awm zat hi W. Phaileng Block-ah 4610, Zawlnuam Block-ah 1211, Mamit Block-ah 1651 leh Reiek-ah 31 te an ni.

He hun hi Pi R. Lalnunthari, DEO Mamit chuan kaihruaiin Pu Lalsailova, DPC, SSA Mamit chuan Key note address a pe a. Pu K. Lalthangkima, HA, SDEO Mamit chuan kalkhawmte hnena lawmthu sawina hun a nei bawk.

He hunah hian Mamit khawpui chhunga Primary School, Middle School, High School bakah Higher Secondary School zirtirtute an tel tha hle a ni.