Vawiin khan Science Teachers’ Association, Mizoram(STAM) chuan General Conference vawi 34-na, Synod Conference Centre, Aizawl-ah an nei a, School Education Minister Pu Lalchhandama Ralte-in khuallian niin a hmanpui.
   
Khuallian Pu Lalchhandama Ralte chuan STAM chu kawng hrang hranga sorkar finchhuahtu leh tanpuitu a ni tiin  lawmman awm miah si lova kan ram rohlu, kan zirlai naupangte chawikanna atana chawl lova thawktu, pawl ropui leh ngaihsanawm a ni, a ti. Minister chuan naupangte nun kaihruaitu, zirna piah lama Career Guidance ni nghal Mizoram Science Journal chhum lo chat lova STAM-in  a tihchhuah thinte chu  ram leh hnam chawikang tura STAM thawhrimzia tilangtu a nih avangin fakawm a tih thu leh hemi ruala Ram pum huap Children Science Congress-ahte  kan project lang pha tura zirtirtuten puanven sawi chhinga tan kan lak thar a tul thute a sawi a, rampum huap anga inelna –NEET, JEE leh Technical entrance exam dangahte kan dinhmunin duhthu a sam tawk loh thu tarlangin zirtirtu leh nu leh pate lam pawhin kan zirlaite leh kan tu leh fate hmakhua ngai lehzuala tum mumal nei chunga lehkha kan zirtir a tul a ni a ti.
     
Vawiin STAM Conference hi thawhhniha neih a ni a, chawhma lamah Conference hawnna leh Mizoram Science Journal Award-te sem a ni a, chawhnu lamah Polythene chungchang zirho a ni a, Resource Person-ah Dr. H. Lalthlangliana, Commissioner, AMC hman a  ni. Hei bakah hian rorel inkhawm neih a ni bawk a, an thurel zingah Technical Entrance exam hrang hrangah Mizo zirlaite’n tun aia an tih that zawk theih nana hma lak te, NIT, Mizoram tihchangtlun leh Mizo zirlai tam zawk an luh theih dan tur te, Mizoramin Central pool hnuaia MBBS Quota kan neih thin, kumina tih tawp tak neih let dan ngaihtuah tura Sorkara thlen chungchang te a tel a ni.
   
STAM hi kum 1986-ah khan ding tanin member 500 vel an awm mek a, Conference-ah hian Mizoram chhung hmun hrang hrang atangin member an tel tha hle.