Health & Family Welfare Minister Dr.R.Lalthangliana hmalaknain mipui ten tangkai zawka an hman theih turin sorkawr damdawi in hrang hrang - District Hospital zawng zawng, State Referral Hospital, Falkawn, Kulikawn Hospital leh Mizoram State Cancer Institute, Zemabawk - ah inentir hun chu zing dar 9:00AM atanga tlai dar 3:00PM thleng OPD hawn a ni tawh dawn.

Hemi chungchangah hian nimin 11th September, 2019 khan Mizoram Sorkara Health & Family Welfare Department chuan Thupek a chhuah a, sorkar damdawi in zawng zawngah thla tina Inrinni vawi hnihna (2nd Saturday) tih lovah chuan OPD hawn hun hi dar 9:00AM - 3:00PM a ni tawh dawn a ni. 2nd Saturday-ah OPD khar thin a ni a, Inrinni dangah chuan working hour pangngai zawm vek tur a ni ang.

OPD Card pek chhuah hun hi 9:00AM - 1:00PM thleng a ni a. OPD card, a hlui leh a thar, registration number nei tawh reng reng chu hnar (reject) tur a ni lo.

He Thupek hi OPD Doctor duty zawng zawng ten zawm nghal vek tur a ni a, a zawm lote chungah Dan anga action lak zel tur a ni.