Nimin khan Justice Michael Zothankhuma, Portfolio Judge, Gauhati High Court, Aizawl Bench chuan Mamit Bethel venga Mizoram Judicial Service Grade I, Grade II leh Grade III te chenna tur Quarters sakna turah lungphum a phum.

Lungphum phumna inkhawm tawi SIRD Auditorium-a neihah hian  Justice Michael Zothankhuma chuan thu sawiin Separation of Judiciary hi Mizoramah chuan kum 2008 atangin tihhlawhtlin ve a ni a. Hetih laia Judicial Officer awm mek mi 23-te chu Mizoram Judicial Service atan seng luh an ni a. Tunah hian MJS Officer thawklai chu mi 46 an awm mek thu a sawi. Mamitah Court Building atan hun eng emaw chen DC Office hman a nih hnuin June 9, 2012 atangin tuna kan Court Building hi luah  tan a ni a. Judicial Officer-te erawhin Quarters an neih loh avangin mimal in luaha an awm a la ngai rih a, chutiang a nih avang chuan tuna Quarters sakna tur lung kan phum thei hi a lawmawm hle a ni a ti.

Kum 2018 chhungin District 4 - Champhai, Serchhip, Mamit leh Siaha-ah Judicial Quarters sakna tur Expenditure Sanction Rs. 2222.21 Lakhs lai a nih thu sawiin High Court Building Rs 46.2412 Crores man sak mek a ni a. March thla tawp thleng khan 39% sak zawh tawh a ni a ti. Aizawl District Court Building Rs. 24.29 Crore man sak mek pawh chak taka kalpui mek a nih thu a sawi bawk.

Mamit District bikah Civil Case 24 leh Criminal Case 111, a vaiin 135 pending a nih thu sawiin Mizoram pumah Civil Case 3212 pending leh Criminal Case 3390 pending avaiin 6602 a awm mek thu sawi.

District Court Service Rules chu an buaipui mek thu sawiin Rules an neih hnuah hna thar tam tak lak a nih dawn thu leh Promotion pawh chak taka kalpui theih a nih tawh dawn thu a sawi bawk.

Khuallian chuan Mamit mipuite chu Judicial Quarters tha tak kan neih theih nana hmalakpui turin a sawm a. Dik taka rorel a nih theih nana Judicial Officers leh Advocate-te lo thawhpui zel turin a sawm bawk.

Er. Lalngaisanga, Senior SDO, Project Sub- Division, Mamit chuan Technical Report pein Dt. 23.08.2017 khan Gauhati High Court, Aizawl Bench chuan Judicial Officers' Quarters sakna tur hi a pawmpui a. Mamit Judicial Officers te Quarters tur hi Rs.465.13 Lakhs senna tura ruahman niin Ni 01.08.2019 a sak zawh hman beisei a ni. Heng Quarters-te hi Earthquake Zone-IV a awm kan nih avangin a tha thei ang berin Foundation Footing leh Superstructure hi M20 Grade R.C.C veka sak tum a nih thu a sawi.

Vawiin lungphum phumna inkhawm tawi hi Pu Jacob Lalawmpuia, Addl.DC, Mamitin kaihruaiin Pu Joel Joseph Denga, MJS, District & Sessions Judge, Aizawl Judicial District chuan kalkhawmte lawmna thu a sawi a. Pi Helen Dawngliani, MJS, Registrar, Gauhati High Court (Aizawl Bench) chuan kalkhawmte hnena lawmthusawina a nei bawk.