Tukin zing khan Lunglei East bialtu MLA leh MYC Chairman ni bawk Pu Joseph Lahimpuia chuan Rs. 23.85 crores senga sak that tur Kendriya Vidyalaya School, Lunglei Ramthar Veng chu a hmunah a tlawh. He hunah hian School Education, I&PR leh Commerce & Industries Department hotute bakah Ramthar Veng khawtlang hruaitute leh tlawmngai pawl hrang hrang aiawhte an tel.

Pu Joseph Lalhimpuia chuan Lunglei Disitrct huamchhungah zirna kawnga hmasawnna tam tak tunhnaiah hmuh tur a awm chu lawmawm a ti a. Kendriya Vidyalaya School chu India ram pum huap pawha zirna in tha berte zinga mi a ni tiin hun reilote ah KV School Ramthar atanga zirchhuakte atangin mi chhawrtlak leh hlawhtling tam tak an la awm ngei a rin thu a sawi a. Cheng vbc 23.85 zeta Lunglei KV School sak that a ni tur chu Lunglei mipuite tan hmasawnna mellung pawimawh tak a nih thu sawiin duat tak leh neitu rilru pu chunga lo enkawl turin kalkhawmte a chah a ni. A bial chhunga khawtlang hruaitute leh pawl hrang hrang ten veng chhung hmasawnna tura tan an lakna chu lawmawm a tih thu sawiin hmasawnna ruhrel hrang hrang – Chanmari Veng Hall, Skill Development Center Chanmari, Education Complex, Electric Veng, Sobji Bazar sak that, Zobawk North Community Hall ah te chak taka hmalak zel a nih thu a tarlang bawk.

He hunah hian Pu Arun Kumar Tumsare, Principal, Kendriya Vidyalaya School Ramthar Vengin hmunhma leh building tha tak a neih theihna tura Mizoram sawrkar thahnemngaihna leh hmalakna avangin lawmthu a sawi a. KVS Ramthar hmasawnna tura kum tam tak theihtawpa hma la tu Pu Joseph Lalhimpuia’n a rawn tlawh chu lawmawm a tih thu sawiin a hmunhma siam that leh building thar sak hna chu tan thuai a nih tur thu kalkhawmte a hrilh a. School building sak that tur leh a hmunhma buaipui tur thui tak ala awm avangin khawltang hruaitu VC, NGO hrang hrang leh mipuite thawhpuiah a sawm nghal bawk.

KVS Ramthar Lunglei hi academic year 2003-2004 khan din niin Class 1 atanga Class 10 thleng a awm a, tun dinhmunah zirlai 306 an awm mek a ni.   MAMCO Corporation Ltd kaltlanga Rs 23.85 crore Detailed Project Report (DPR) siam chu pawm tawh niin July 11, 2018 ah KVS Headquarter, Delhi atangin hna hi thawk tan turin hriattirna lehkha dawn tawh a ni.