194/2022-2023
Mamit 19th April, 2022 : Vawiin khan I&PR Conference Hall, Mamit-ah Fire & Emergency Services, Mamit leh Information & Public Relations Department tangkawpin an buatsaih Special Training on Fire Safety & Fire Prevention Programme for Media Personnel neih a ni.

Pu Lalngurthanga, Leading Fireman, Mamit chuan Thutharthehdarhtute chu ram leh khawtlang tana mi pawimawh tak, mipuite a tha zawnga kaihruaia zirtir theitu an nih angin an hnena kangmei ven dan tur inzirtirna neih chu mipuite tana thil tangkai tak anih ngei a beisei thu a sawi a. Fire & Emergency Services, Mamit dinhmun tlangpui tarlangin Staff indaih lohna avanga harsatna hrang hrang a awm thin thu a sawi a. Tun dinhmunah hian Fireman 6 leh Driver 2 te nen an vaiin mi 9 an awm mek thu a sawi.

He hunah hian Pu Robert Lalrinsanga, Fire & Emergency Services, Mamit chuan mei tangkaina bakah kangmei hlauhawm dan, kangmei chhuak lo tura fimkhur dan hrang hrang bakah kangmei tawh palha awmdan tur hrang hrangah zirtirna pein Pu H. Lalremruata, Fire & Emergency Services, Mamit chuan Nikum 2021 leh kumin 2022 chhunga an chetchhuahna hrang hrang report a pe a. Nikum chhungin kangthelha tum 11 an tlanchhuah thu leh kangmei tam zawk hi ram kang a nih thu a tarlang a. Heng kangmei chhuakte hi mahni in leh a vel vawnfai that loh vang te, meikawng sial that loh vang bakah a bul berah chuan kan fimkhur loh vanga thleng a nih thu a sawi. Fire Extinguisher hman dan tur zirtirna a pe nghal bawk.

Mamit khawpui chhunga kangmei chhuak awm palh thulhah Mamit Fire Station Phone No : 03892565077 leh Mobile No : 7628026922 -ah a ranglama hriattir thin turin mipuite ngen kan ni.

He hun hi Pu Paul Rokima, DIPRO Mamit chuan kaihruaiin zawhna leh chhanna hun tha tak hman ho nghal a ni bawk.

He hunah hian MJA, Mamit Members te an tel tha hle a ni.