193/2022-2023
Aizawl 19th April 2022:Vawiin khan Government Aizawl West College-a programme buatsaihah I&PR Minister Pu Lalruatkima chuan Thukphum tih lehkhabu a tlangzarh.

Minister Pu Lalruatkima chuan Thukphum hi lehkhabu rotling leh zirlaite leh ziak mite tan pawha hlu tak tur nia a hriat thu a sawi a. Pu James Dokuma te, Zikpuii Pa (Pu KC Lalvunga ) te leh Mizo ziaktu lar leh hranghlui tam tak kan neih te lehkhabu ziah leh an sulhnu chhui zauna leh zir chianna hetiang anga chhiar tura buatsaih a ni thei hi a hlu tih sawiin a buatsaihtute a bik takin, Principal leh Mizo Department leh Literature Club, Aizawl West College te chungah lawmthu a sawi a ni.

Pu Lalruatkima chuan Mizote hi mi lungleng thei tak leh hnam ang pawha mite entawn tur ngah pawl tak, pipute sulhnu han en leh han belhchian pawha chhui zui theih tur leh thawnthu buatsaihna tham tling tak nei kan ni, a ti a. Hla (Poem) lamah pawh Mizote hi kan duai lo hle a, kan Mizo ziaktuten kan hun tawn mil leh a boruak a zira hmangaihna lam (love story) emaw, Mizo Ziarang (Culture) emaw tarlang thei tura thiam taka an han ziak thei te hi a hlu em em a, thangtharte pawhin an sulhnu chhui tur leh heng an thuziak te atanga zir tur pawh hi tam tak kan neih theih phah bawk a, hun lo la kal zel turah pawh Mizo thalai, thangtharte hian mahni kutchhuak ngei hi nasa zual zawkin kan la hlut tulh tulh dawn a, chumi hunah chuan heng kan ziaktu thiam leh lar tak takte kutchhuak hi tun aia nasa zawk hian khawvel hmun hrang hrangah hnam dangte hmuh leh zir theih tur pawhin kan la pho chhuak ngeiin ka ring bawk a ni, I&PR Minister Pu Lalruatkima chuan a ti.
Mizo thawnthu chungchang zirchianna October 28 atanga ni 30, 2021 chhung khan State pum huap anga neih a ni a, he zirchianna hunah hian Mizo ziaktu kan neih thiam tak tak leh ril tak tak te thuziak hmang tein heng Mizo thawnthu kan neih ang hrang hrangte sawifiahna leh a bulthut zirchianna an nei a, chutatanga an thuziak te lakkhawm chu lehkhabuah siamin “Thukphum” hi buatsaih a ni ta a ni. Thuziak thawhtu hi an vaiin mi 23 an awm a. Editor te hi Pi Lalsangpuii, Pi Vanhlupuii Ralte leh Pu H. Lalawmpuia te niin Govt. Aizawl West College Mizo Department zirtirtute an ni.

Vawiin program hi Pu H Lalvulliana, Govt. Aizawl West College Mizo Department HOD in a kaihruai a. Dr. H Laldinmawia, PUC Asst Professor chuan lehkhabu thlirlawkna hun hmangin GAWC Principal Prof C Lalthlengliana pawhin thu a sawi a ni.