Vawiin chawhma dar 10:00 khan Dr Vanlalfela, Chief Medical Officer, Mamit District kaihhruaina hnuaiah Rotavirus Vaccine (RVV) Launching Programme hman a ni a. Dr Lalrozama, IAS, Deputy Commissioner, Mamit District chuan khuallian niin a hmanpui.

Dr Lalmuanawma Jongte, District Immunization Officer, Mamit District chuan Rotavirus Vaccine chungchang sawizauna a nei a. Rotavirus Vaccine chu kawthalo thlen theitu Rotavirus laka invenna a nih thu leh Rotavirus vanga kawthalo thleng thei 40% lakah vaccine hian min ven theih tur thu a sawi bawk. Rotavirus vaccine hi kâa thlawr tur niin far nga pek tur a ni.  Oral Polio Vaccine vawikhat lakna ruala pek ve tur niin he vaccine hi vawi thum lak tur a nih tur thu  tarlangin,  Vaccine lak avanga harsatna tawk nî-a inhria kan awm a nih chuan ngawih bopui mai lova Health Worker te hnena hriattir emaw damdawi In a inhruai  ngei turin Vaccine latute hi a chah bawk a ni.

Dr Lalrozama, IAS, Deputy Commissioner chuan thu sawiin, nûte chu an fate tana an pawimawh hle a, Vaccine la tha lo chu hriselna leh rilruah an khingbai nge nge tih sawiin, hridanna tha taka la turin leh kalkhawm nûte hnenah an hriatthiam loh chu Health Worker te zawt hreh lo turin a chah a. Hri danna chungchang hi a theih ang anga lo inhrilh darh tur leh theihtawpa Health Deparment puitu ni tur leh thawhhopui turin kalkhawmte a chah bawk.

Mamit DC hian Rotavirus Vaccine hawn nan hian  naupang hnenah pê-in vaccine hi Health Worker te'n an pek chhunzawm a ni.