Nimin khan Pu Lalrintluanga Sailo, Govt.Dy Chief Whip leh Pu PL Chhuanthanga, Mizoram Rural Bank Chief Manager-te chuan Marpara leh a chhehvel khuate mamawh em em MRB Marpara Branch Office tur leh Staff Quarters tur hmunhmate an enfel.

Marpara Branch MRB chu Farkawn nen a ruala buatsaih chhoh mek a ni a. Bank tan hian hlawk viau-na tur awm lo mahse mipuite mamawhna phuhruk tur leh mipui rawngbawlna a ni tih hriain Marpara MRB Branch chu hawn a ni dawn a. Reserve Bank of India (RBI) phalna pawh hmuh thuai beisei a ni a, mipuite'n tangkai taka hmang turin leh a thawktute pawh lo thlawp a, lo thawhpui thiam turin bialtu MLA hian a chah a ni.

Marpara Branch hi MRB Branch 86-na ni turin thil tul hrang hrang network leh security lamte tihfel anih hunah tun atanga reiloteah hawn thuai a nih dawn thu MRB Chief Manager chuan a sawi a. Bialtu MLA thawhrimna leh nawr nat avanga he MRB  Branch hi hawn a nih tur thu a sawi bawk.

Mizoram Rural Bank hi MGNREGS hnuaia Job Card holder-te hlawh lakna thin anih angin tuna MRB Marpara Branch awm tur hi a chhehvela awm khaw 10 velin an hmang tangkai thei dawn a. Bank Branch hnai ber chu W. Phaileng anih avangin mipuite'n Ni 100 inhlawhna hlawh an lakna kawngah harsatna tamtak an tawh phah mek a. Tun dinhmunah Dampa Assembly Constituency huamchhungah MRB Branch pakhat bak Bank dang hrim hrim a awm lo a. A bial mipuite hian Bank hi an mamawh tak zet zet a ni.

Marpara Branch MRB hi mimal in luah lailawk phawt tura ruahman a ni a, a bul hnai lawkah Staff Quarters tur leh Security Guard awmna turte pawh ruahman nghal a ni bawk.