Vawiin hian Serchhip District chhungah Rotavirus Vaccine pek beihpui thlak neih tan niin a hawnna inkhawm tawi New Serchhip Sub-Centre a District Immunisation Task Force Chairman Pi Sangchhin Chinzah, bawrhsap hovin neih a ni.

A hawnna inkhawm tawiah hian Pi Sangchhin Chinzah chuan, kawthalo leh luak vangin vawiin thlengin kan fate damdawiinah kan la dahlutin; vanduaithlak taka min boral san te pawh an la awm a. India ram pum anga thlir phei chuan he natna vanga hun, tha, sum leh nunna kan hloh hi a la nasa em em a ni. Sawrkar laipui chuan he natna thlentu langsar ber pakhat Rota Virus vaccine pek a rel ta a, a lawmawm tak zet a ni. Injection te a ni lem lo bawk a kan fate, a la thei zawng zawngte lo lak tir vek turin kan district chhunga nu leh pa zawng zawngte ka ngen che u a ni, a ti a ni.

He hun kaihruaitu Dr. Lalhlunpuii, DIO pawhin Rota Virus vaccine chungchang sawifiahna a nei bawk a, a bul tan nan naute thla khat leh a chanve te hnena pek phawt tur a ni a, a hnuah thla hnih leh a chanve leh thla thum leh a chanve te hnenah pek leh tur a nih thu a sawi a. Naute kaa drop vawi nga thlawr mai tur chi a nih thu leh he vaccine hi naupiang zawng zawng hnenah normal vaccine anga pek zui zel tawh tur a nih thu a sawi. Vaccine la te chu kawthalo leh luak lakah an him hmak dawn tihna a ni hran lova, kawthalo vanga damdawiin luh ngai khawpa nat theihna lakah mi a veng thei tura ngaih a ni thung a ni, a ti.

He vaccine hi vawiin atangin district chhunga Sub-Centre tinah pek chhuah tan tur a ni a, ASHA te pawhin an bial fang chhuakin a la tur naute zawng zawngten an lak ngei theih nan hma an la dawn a ni.

Vaccine pek bultan inkhawmah hian Dr. Laldawnglianga Sailo, CMO leh Pu K. Saitluanga, MIS, Member, District Task Force te leh chanchinbumite , Medical lama thawktute, vaccine la thei New Serchhip huam chhunga nausen (naute) thahnem tak an tel a ni.