Tun thla May ni 23 a Mizoram Lok Sabha MP inthlanpui-a vote tlate chhiarna tura Mamit District inbuatsaihna kalpui mek chu nimin khan DRDA Conference Hall, Mamit-ah Joint CEO Pu H. Lianzela leh a team-te'n an enfiah a, Mamit District inbuatsaihna chu a that thawkhat thu an sawi a. Duhkhawp lohna lai awmte chu siamtha leh turin an ngen nghal.

Mamit District inbuatsaihna leh inpuahchah dan thlirhonaah hian Mamit District Bawrhsap, District Election Officer ni bawk Dr. Lalrozama, IAS chuan MP inthlanpui neih zawh taka Mamit District MLA Constituency 3 a vote tlate chhiar tura an inbuatsaihna leh an ruahmannate a sawifiah a. Vote tlate chu Mamit DC Complex chhung Counting Hall 3-ah chhiar tura ruahman a nih thu te, Counting Hall tina counting table awm tur zat an ruahman dan te, Counting Supervisor mi 32, Counting Assistant mi 32 leh Micro Observer mi 32 an ruatfel tawh thu leh Training an neih hun tur pawh an hrilhhriat tawh thu te, Counting Hall tina Suvidha leh Data Entry Operator turte pawh an ruatfel tawh thu leh Counting Officials turte pawhin May Ni 11 khan hlawhtling taka first randomisation an neih tawh thute a sawi a. Pu Victor Lalawmpuia, Election Officer, Mamit pawhin Power Point Presentation hmangin an inbuatsaih dan tlangpui sawifiahna a nei bawk.

Jt CEO Pu H. Lianzela hova Mamit District inbuatsaihna thlirhona neih zawh hnu hian Mamit DC Complex chhunga Counting Hall 3-te an enfiah a. Vote chhiar Ni-ah thli leh ruahsur palh pawha vote chhiar a khaihlak loh nan EVM dahthatna Strong Room leh Counting Hall inkar chu a chung neia zarphui vek an duh thu an sawi.

Tarlan tawh thin angin Mamit District-ah hian polling station pangngai 116 bakah Kanhmun Special polling station 9 nen avaiin polling station 125 a awm a, tun Lok Sabha MP inthlanpuiah khan vote 42315 ( 63.33%) a tla a, Kanhmun special polling station bikah vote 2930 (32.42%) a tla bawk a ni, heng vote-te hi Mamit DC Complex chhunga Counting Hall 3-ah chhiar tura ruahman niin Hachhek AC chu Mamit DC Conference Hall, table 8-ah round 6 a chhiar zawh tura ruahman a ni a, Dampa AC chu Mamit DC Office Annexe building, table 8 ah chhiar a, round 5 a chhiar zawh tura ruahman a ni. Mamit AC chu LAD Conference Hall, table 10-ah round 5 a chhiar zawh tura ruahman a ni a. Vote hi May ni 23 zing dar 8:00 am atanga chhiar tan tura ruahman a ni.

Jt CEO Pu H. Lianzela hi Deputy CEO Pu CC Lalchhuangkima leh Consultant Pu Alan Lalhriatpuia te'n an tawiawm a ni.