Vawiin chawhma khan United States Ambassador to India Pu Kenneth I. Juster chuan SHALOM (Society for HIV/AIDS and Lifeline Operation in Mizoram), Lower Zarkawt, Synod Office, Mission Veng leh Excise & Narcotics Department, Khatla a tlawh a. U.S. Consul General, Kolkata Pi Patti Hoffman, Public Affairs Officer Pu Jamie Dragon leh Assistant Public Affairs Officer Pu Jay Treloar ten an tawiawm a ni.

SHALOM, Lower Zarkawtah hian Centers for Disease Control and Prevention (CDC) aiawhin Dr. Melissa Nyendak, National AIDS Control Organisation (NACO) hnuaia Targeted intervention (TI) Deputy Director, Dr. Bhawani Singh, Mizoram State AIDS Control Society (MSACS) Project Director Dr. Lalthlengliani ten US Ambassador hnenah HIV/AIDS venna kawnga hmalakna hrang hrang leh Mizoram dinhmun hrilhhriatna hun an nei a. SHALOM CEO Dr. Chawnglungmuana chuan mizo thalaite zinga HIV/AIDS vei zat leh SHALOM hnathawh dan tlangpui a tarlang a. US palai Pu Kenneth I. Juster chuan HIV/AIDS dona kawnga theihtawp chhuah a tulzia a sawi a. Mizorama HIV/AIDS tihtlem kawnga hmala tute nena inkawmhona neih a ni chu lawmawm a tih thu a sawi a. HIV/AIDS veite kawmna hun a nei zui nghal a ni. SHALOM hi kum 1997 khan din niin Mizorama HIV/AIDS titlem tura nasa taka hmalatu an ni a. MSACS nena thawk hoin kum 1998 atang khan injecting drug users zingah hmalakna a kalpui a. HIV program - Prison leh  Adolescent Intervention leh HIV+ Care and Support program a kalpui a. Tleirawlte zingah Substance Abuse Prevention leh Sexual & Reproductive Health lamah hmalakna a nei mek bawk. Kum 2016 atang khan FHI360 thawhpuina hnuaiah Project Sunrise kalpui tan a ni a. United States PEPFAR (President's Emergency Plan for AIDS Relief) bultum niin CDC, USA chuan a endik thung a ni.

United States Ambassador chuan Synod Office, Mission Veng a tlawh leh a. He hun hi Mizoram Synod Moderator Rev. R. Lalhmingthanga chuan a kaihruai a. US palai Pu Kenneth I. Juster chuan thu sawiin Mizoramah hian kohhranin dinhmun pawimawh tak a chelh a ni tiin India rama a zinna hrang hrangah pawh sakhuana leh hnamzia tarlanna hmun a tlawh thin thu a sawi a. He hunah hian Mizorama Presbyterian kohhran dinhmun leh member zatte tarlan niin India rama  sakhua te zawk ten harsatna an tawh thin chungchang te an sawi ho a ni.

Hemi zawh hian Excise & Narcotics hotute a kawm leh a. Excise & Narcotics Department hnathawh dan tlangpui Assistant Commissioner of Excise & Narcotics Pu Peter Zohmingthanga chuan a tarlang a. Mizoram chu a awmna hmun vangin drugs tawlhrukna atana hman a nih thin thu te, Department in kum tam tak chhunga damdawi, silai leh rangkachak a man zat te, mizo thalaite zinga damdawi hmansualna a tam telh telh thu te, mipuite hnena drugs leh a kaihhnawih dang chungchanga inhrilhhriatna neih tam a tul thu te sawi ho a ni.

US Ambassador to India Pu Kenneth I. Juster leh amah tawiawm tute hian vawiin chawhnu hian New Delhi lam an pan dawn a ni.