Vawiin khan I&PR Conference Hall, Mamit-ah DP&AR leh DIPR, Govt of Mizoram bultumin The Mizoram Right to Public Services Act, 2015 chungchang inhrilhhriatna hun chu DIPRO Office, Mamit buatsaihin neih a ni.

The Mizoram Right to Public Services Act, 2015 hi Pu Paul Rokima, DIPRO, Mamit-in Power point Presentation hmangin chipchiar takin kalkhawmte zirtirna a pe a. He danin a huam chin leh mipuite'n dan hnuaia chanvo kan neih hrang hrangte tarlangin he Act hnuaia Department tel 6-te Services hrang hrang 46-te a tarlang.

The Mizoram Right to Public Services Act, 2015 ang hi India rama State hrang hrang 18-ah hming hrang hrang puin hman mek a ni a. Mizoram chu 19-na kan ni. Pu Paul Rokima chuan dan tha tak tak Sorkar-in mipuite tana a duante chu a kawhmawhbawl zawng leh Sorkar Department khei zawnga hman tura duan a ni lova, kan chanvo kan humhimna tur leh kan dikna kan hailanna tur atana duan a nih thu a sawi a. Mipuite chu he danin chanvo min pekte a taka hman a nih ngei theih nan kan mawhphurhna hlenchhuak tura tan la turin a chah bawk.

Pi Laltharzeli, Ambassador, SBM pawhin thusawiin mipuite'n kan dikna chanvo kan humhalhna kawngah a thlenna tur dik taka thlen nachang hre lovin Social Media etc vela au chhuahpuiin kan lungawi mai thin a. Hei hi thil tha lo tak niin MRTPS Act, 2015 hnuaia dan tha tak chu tangkai taka hmang turin kalkhawm mipuite a sawm bawk.

He hun hi Tv. Lalropuia, Treasurer, Sub Hqrs YMA-in kaihruaiin Pu Z. Sangliana, President, MUP Sub Hqrs-in hunserh a hmang a. Kalkhawmte atanga hriat belh duhte zawhna hun hawn niin zawhnate hi Resource Person Pu Paul Rokima'n a chhang nghal a ni.

He hunah hian Mamit khawpui chhunga Sorkar Department aiawh, tlawmngai pawl hrang hrang, khawtlang hruaitu, District Consumer Forum, zirlai naupangte leh thutharthehdarhtute an tel a ni.