Vawiin khan Reiek khuaa Higher Secondary School hmasa ber tur St.Benedict’s Higher Secondary School chu School Education Director Pi Lalzarmawii, IAS-in a hawng.

Khuallian, School hawngtu  Pi Lalzarmawii chuan Reiek khua chu  zirna lama thangharh hmasa,  IAS engemawzat leh mi thiam langsar tak tak hring chhuaktu a ni a, hetiang riang ruang khuaa Higher Secondary School a la awm miah loh laia mi thahnemngaite za ra Higher Secondary School  din a ni ta chu lawmawm a tih thu a sawi a, zirlaiten zirna sang zawk an zirna tura insengso taka hmun dang an pan thin chu tunah chuan a ziaawm tawh dawn a, hei hi Reiek leh a chhehvel khuate tan a lawmawm zual a ni, a ti a. Tun dinhmunah zirlai la tam viau lo mah ula, in la pung chho ve zel ang a, zirnaah chuan  tam lam aiin zirna quality a pawimawh zawk avangin mi hmantlak ni tura theihtawp chhuahin bei ang che u tiin zirlaite leh zirtirtute a fuih a ni.  Pi Lalzarmawii chuan St. Benedict’s Higher Secondary School  chu  mi mal din zirna in ni mahse, Sorkar atanga tanpuina awm thei ang ang pek a inhuam thu sawiin School tan hian Computer Set khat, Greenboard leh Chalk te a pe a ni.

St. Benedict Higher Secondary School hi Bialtu MLA Pu Lalrintluanga Sailo hmalaknain hawng turin hmalak a ni a, a bul tannaah  hian Arts stream kalpui phawt  a ni  a, tun dinhmunah zirtirtu 5, Non.Teaching Staff 2  leh zirlai 16  an awm mek a ni.

School Education Director hian chawhnu lamah Reiek khaw chhunga Sorkar School hrang hrangte a tlawh nghal a, Education Department-a thawktuten an tawiawm a ni.