3461/2022-2023

Mamit 2nd February, 2023 : Vawiin khan Mizoram chhung hmun dangte rualin District Disaster Management Authority, Mamit District bultumin Mamit khawpui chhung site hrang hrangah lirnghing lo thlen thulha chetlak dan tur nunchan inzirtirna Mock Exercise neih a ni.

Vawiin Mock Exercise hi Mamit khawpui chhunga Incident Site thlanchhuah hmun panga(5), Govt. PS-V, Govt. Mamit College, Pi Lalremruati In, Charkawn, Mall, Bazarveng leh District Hospital-ah te neih a ni a. District Emergency Operation Centre (DEOC) tihnun niin heta tang hian Pu Lalnunhlua, Chairman, DDMA-in a lo vil a. Pi Lalthangpuii Pulamte, SP, Chief Observer-na hnuaiah Incident Commander leh Observer inruat vek a ni bawk.

Chhiatrupna lo thlen thulha chetlak dan tur nunchan zirna-ah hian mawhphurhna nei hrang hrangte'n an tihtur theuhte tha taka hlenchhuakin, hemi chungchanga mawhphurhna neite hian vawiin chawhnu dar 2:45 khan DC Conference Hall-ah Mock Exercise thlirletna (de-briefing) neih zui nghal a ni bawk.

Vawiin Mock Exercise-ah hian 4th IR atangin Disaster Response Force te'n chhanchhuah hna thawkin, Medical lamin hliam tuarte enkawlna hna an thawk a. Fire Department, Police bakah DDMA Member, khawtlang hruaitute leh thutharthehdarhtute'n an mawhphurhna theuh tha takin an hlen a ni.