Ni 21-22 January, 2020 khan I&PR Conference Hall, Mamit-ah MZP Hqrs Mamit leh Samagra Shiksha Mamit buatsaihin Mamit khawpui chhunga HSLC zirlaite tan District Level Quiz Competition buatsaih a ni a. Quiz hawnna hun hi Dr. Lalrozama, IAS, District Bawrhsap chuan khuallian niin a hmanpui.

Khuallian chuan hun harsa leh khirh tak paltlanga Quiz buatsaihtu MZP Mamit chungah leh Quiz hlawhtlin nana hmalatu Samagra Shiksha leh District Child Protection Unit te chungah lawmthu a sawi a, Zirlai naupangte chu hmasawn zel tur an nih anga Quiz chu hmasawn nana hmang turin a chah a, tang tak siin tang ulh zawng ni lovin, chhanna kan hriat loh pawh kan zirlai lehzel tur atan chhawr tangkai tum ngei turin a chah a ni.

DC chuan Education chu puitlinga min siamtu a ni a, kan zirlaiah taihmakna leh tumruhna nasa zawk nen hmalam pan tura chahin chak zawkte lawmpui a, chak lote pawhin hmasawn nana hmang tura zirlai naupangte chu chahin District Level Inter High School Quiz hi a hawng a ni.

District Level Quiz Competition-ah hian Mamit khawpui chhunga School pali aiawhte'n inelna an nei a, Presbyterian English Medium School-te'n lawmman pakhatna an dawng a. St. Francis of Assisi School-te pahnihna niin New Diamond School pathumna an ni. Lawmman pakhatna hian Trophy, Citation bakah tangkafai Rs 15000/- a keng tel a. Pahnihna hian Trophy, Citation bakah Rs 10000/-, lawmman pathumna hian Trophy, Citation bakah Rs 7000/- a keng tel a ni.