No.4425/2020-2021

Mamit 24th August, 2020 : Vawiin khan DC Conference Hall, Mamit-ah Ni 24-28 August, 2020 chhunga hman tur National Deworming Day (NDD) Week hawnna Dr. Lalrozama, IAS, Chairman DLCC/ District Bawrhsap chuan a nei.

Dr. Lalrozama chuan naupang thanglaite hriselna tichhiaa an than tithutu, rulhut paihbo tura naupang rulhuthlo pek chu thil pawimawh tak a nih thu a sawia, Mamit District chu Aspirational District kan nih avangin naupang hriselna kawngah tan kan lak nasat a tul thu sawiin damdawi pek chhuah leh a ei kawngah thahnem ngai tak leh Sawrkar laipui duhdan ang ngeia, a nih dan tura ei tur leh helama thawktute pawh damdawi eitir kawngah taimak chhuah lehzual turin a chah a ni.

Dr Vanlalfela, Chief Medical Officer ( CMO) Mamit chuan rulhutin kan taksa a nghawng a neih dante leh rulhuthlo ei pawimawhna bakah NDD Week chhunga hmalakna tur tarlangin, Rulhuthlo (Albendazole Tablet) hi naupang kum 1 atanga kum 19-te hnenah pek an ni dawn a, Mamit District chhungah mi 31079 te hnena pek tura ruahmanna awmsa angin hmalak tur niin COVID-19 hrileng mek avanga School, Anganwadi etc hawn theih anih loh avangin, Rulhuthlo hi Mamit District chhunga ASHA-te chuan in tina kal chilha pek tura ruahmanna a nih thu a sawi a. Mamit District chhunga ASHA awm lohna khua khaw 21-ah erawh Zirtirtu leh Anganwadi Workers tangkawpa pek a nih dawn thu sawiin Damdawi semtu tur ASHA te leh thawktu dangte hian Face Mask leh Hand Sanitizer tha taka hmangin, hri inkaichhawn theihna ang chi pumpelha damdawi hi in pek a nih dawn thu a sawi bawk.

Rulhuthlo (Albendazole Tablet) hi naupang kum 1-2 te tan mum chanve (200mg) a pek tur niin damdawi mum chanve chu thirfian hmanga tisawmin tui thianghlim nen chawhpawlha pek tur a ni a. Kum 2-3 te hi mum khat (400mg) a pek tur niin damdawi mum khat chu thirfian hmanga tisawmin tui thianghlim nen chawhpawlha pek tur a ni a. Kum 3-19 inkar chu mum khat (400mg) a pek tur niin damdawi chu sehsawmtir tur a ni thung a, damdawi ei zawh hnuah tui thianghlim intir ngei ngei tur a ni. Naupang damlo emaw damdawi ei lai nei chu Rulhuthlo hi pek loh tur a ni.

National Deworming Day hi kumin February thla khan lo kalpui tawh niin mi 28208 target atangin 94.72% Achieved a ni a. Hemi tum hian West Phaileng Block huam chhungah Rulhuthlo ei an tlem ber avangin tun tumah hian abik takin West Phaileng Block-ah week chhung hian nasa lehzuala hmalak a ni bawk ang.

National Deworming Day hawnna hunah hian District Bawrhsap hian naupang thlan bikte hnenah rulhuthlo hi a eitir nghala. He hunah hian Health Department-a thawktute, DPO, Addl DC, Dy. DPC, DLAO leh DIPRO, Mamit-te bakah sawmbikte an tel a ni.