2064/2023-2024

Mamit 29th September, 2023 : Vawiin khan Deputy Chief Minister Pu Tawnluia chuan Mizorama a hmasa ber- Mamit District ODF Plus Model District lawmna chu Chhimveng YMA Hall, Mamit-ah hmanpuiin khuallian a ni a. Mamit Bawrhsap Pu VL Remliana'n a lo dawngsawng a ni.

Khuallian Pu Tawnluia chuan vawiin ni chhinchhiahtlak tak Mizoram puma ODF Plus hmasa ber atana puan, Mamit District mipuite chungah lawmpuina chibai a buk a. Vawiin hi a bul tanna a ni tih hria a, thawhrimna thahrui min petu ni se, faina leh hriselna hi inkawp tlat niin a tihhlawhtlinna tur atan mimal tinte kan pawimawh a ni tih hre tharin mimal bakah chhungkaw tinah faina ngaipawimawh thar turin a chah. Thianghlim a tulna inzirtirna leh inhriattirna nasa lehzualin kalpui leh zual ila, heng kawnga sawrkar hmalakna te thlawp zel turin Mamit mipuite a sawm bawk a ni.

Khuallian chuan ODF-Plus Model dinhmun chawinung zel tur hian kan fai zel a pawimawh angin hemi hun chhung pawh hi Faina beihpuithlakna hun atana hmang theuh turin a ngen nghal bawk a. ODF Plus model District dinhmun Mamit District-in a luah theihna tur atana thawktute, Mamit Deputy Commissioner leh District mipuite chungah lawmthu a sawi bawk a ni.

Mamit District huam chhunga Constituency pathum 1-Hachhek, 2-Dampa, leh 3-Mamit a Watsan Committee zawng zawng hnenah lawmpuina Certificate leh pawisa fai hlan an ni nghal bawk a ni.

He hunah hian Er. C.Lalremsiama, Secretary, PHED hnen atangin thusawi tawi ngaihthlak niin Er. Helen Saibuangi, EE, Mamit Watsan Division PHED hnen atangin Technical Report ngaihthlak a ni a. Er. H.Duhkima, Director, PMU, PHED chuan lawmthu sawiin he hun hi a khar a ni.

Mamit District hi 13th July 2023 khan ODF Plus Model District-ah puan a ni a. Mamit District-ah hian khaw 83 a awm a, khawper 4 leh SBM-G IMIS-a a landanin block 3 a awm a ni. Zawlnuam Block-ah hian khaw 41 a awm a, W. Phaileng Block-ah khaw 22 leh Reiek Block-ah khaw 20 a awm a ni.

Mamit District hi India ram a Aspirational District 112 zingah Mizoram-a Aspirational District awm chhun a ni a.

India rama District 746 zingah District 76 ODF plus Model ni tur chuan District chhunga khua zawng zawng hi ODF an ni tur a ni. December ni 27, kum 2017 khan Mamit District hi ODF (Pawnlera inthiar awm lohna) a lo ni tawh a. ODF Plus Model ni tur hian Central Ministry-in tehfung hrang hrang an siam hi kan zawmkim vek a ngai a. Chung tehfung hrang hrang te chu

1) ODF status hi an vawng nung zel tur a ni a, pawnler a inthiar awm lohna an ni tur a ni.

2) Solid Waste Management : Mumal takin bawlhhlawh sakhat sawngbawlna kalpui (Solid Waste Management) thin a ni bawk a. Hemi atan hian khua zawng zawngah Community Compost Pit leh Individual Compost Pit sak a ni. Community Compost Pit hi 152 sak a ni a. i) Reiek Block – 41 unit ii) Zawlnuam Block – 55 unit iii) W. Phaileng Block – 56 unit te a ni.

3) Tuichhe sawngbawlna (Grey Water Management) : Hei hi mumal taka kalpui tur a ni bawk a. Chung atan chuan Community Soak Pit sak a ni a. i) W. Phaileng Block – 392 unit ii) Zawlnuam Block – 388 unit iii) Reiek Block – 286 unit te an ni.

Hei bakah hian chhungkaw tam takin mahni ram chhungah chuktuah huan chawmna atan te an hmang tangkai bawk a ni.

4) Hmuh theih a faina (Visual Cleanliness) : Hei hi vawngnung turin nasa takin khaw tinin theihtawp an chhuah a, vawi tam tak hnatlangin WATSAN Committee te'n hma an la a, tun dinhmun hi an thlen pui thei a ni.

5)    Wall Painting : Khua zawng zawngah hian Faina leh thianghlimna inzirtirna lemziak (Wall Painting) tarchhuah a ni tawh bawk a ni.