344/2024-2025 

Mamit 24th April, 2024 : Vawiin khan Directorate of Local Fund Audit & Pension buatsaihin I&PR Conference Hall, Mamit-ah Mamit District chhunga Pension Dealing Staffs-te tan Pension and Process of Pension Papers chungchangah nikhat awh training neih a ni.

Pu F. Lalremmawia, Deputy Director (Pension) chuan sawrkar hnathawk pension chungchanga fello awm thinte, hun rei tak chinfel lohte kan nei thin a,  chung ang kan harsatnate awlsam zawka chinfel zung zung  a nih theih nana, training buatsaih a nih thu a sawi. Mamit District chhunga pension buaipuitute pawhin an tangkaipui a beisei thu sawiin, harsatna leh hriatthiamloh zawh duh an nei a nih pawhin Directorate lama Pension khawihtute chu phone hmang pawha zawh reng theih an nih thu a sawi bawk.

Vawiin training-ah hian Pi R.Laltanpuii, AA/AO (pension), Pu Lalkroschhuanga, AA/AO (pension) Pu Albert Lalthansanga, AA/AO (pension) te'n pension buaipuina tura tul hrang hrangah zirtirna chipchiar takin an pe a ni.

Training hi Pu Zothanzama Sailo, District Treasury Officer, Mamit chuan kaihhruaiin Mamit District chhunga Department hrang hrang atangin Pension buaipuitute an tel tha hle a ni.