India ram chhung hmundangte rualin, Ministry of Woman and Child Development atanga thuhmuh angin District Programme Office(ICDS), Mamit buatsaihin Nu leh nausen in chaw tha an hmuhtheihna tur atana hmalakna,  Poshan Pakhwada hawnna hun vawiin khan I&PR Conference Hall-ah hman a ni. 

He hun hi Pi Lalramngaki Swasth Bharat Prerak ( SBP) District Lead chuan kaihruaiin Pashan Pakhwada in a tum leh hman a nih chhante leh Dt 8-22 March, 2019 chhunga kalpui a nih dan turte bakah programme hmachhawp hrang hrangte sawizauna  a nei a, Health Department lam atangin Pi Eloy Zonunpari, Co-ordinator , National Rural Heath Mission chuan thusawiina neiin Nu naupaite leh nausen te'n chaw tha an hmuha, an hriselna vawng him tura hmalakna kawngah Health Department te leh Social Welfare te chu tangkawp tlat an nih thu sawiin, Mamit District pawhin he lam kawnga hmalakna-ah tanlak kan ngaihzual bik thu a sawi a. Thildangah eng ang pawn changkanna kawng zawhin thleng sang viau pawh ni ila, nu nau chunga thi/nausen thi kan la tam viau chuan ram changkang leh hmasawn tehna kawngah kan thlen chin a san theih loh thu a sawi, tun dinhmunah Mamit District chhunga naupiang 1000 zelah nausen thi mi 19 vel zel la awm ang kan nih thu a tarlang tel bawk a ni. Hriselna leh thianghlimna kawnga PHE Department lamain hma an lakna kawng hrang hrangte Pi Lalduhsangi PHED, SBM in sawizauna  a nei bawk.

Vawiin Poshan Pakhwada hawnna hunah hian Mamit khawpui bakah a chhehvel atangin Anganwadi Centre 11-a Workers te an tel a, Poshan Pakhwada puala hun hman a nih chhung hian nu leh nausen hriselna kawnga hmalak nan leh eitur tha leh hrisel ei pawimawhzia inzirtirna hun hman chhoh zel tum a ni bawk.