Vawiin khan Chhimveng YMA Hall, Mamitah District Research Officer, Economics & Statistics Department, Mamit District buatsaihin " Ensure timely Registration of Births & Deaths" tih thupuia hmangin Annual Training of Registrar of Births & Deaths 2018 neih a ni a. Pu H.Lianzela, Mamit Addl.DC kalchhuak tur chuan khuallian niin he hun hi a hmanpui.

Khuallian chuan thu sawiin Mamit District tana Addl.DC a nih chhunga khawtlang nu leh pa, NGO leh Sorkar hnathawkte nena thawhhona tha tak an nei thei chu lawmawm a tih thu sawi hmasain Statistic dik leh rintlak a pawimawh thu a sawi a. Mihringte'n pianni leh thihni kan nei vek a, kan pianni leh kan thihni te hi Pathian ruatsa liau liau anih avangin mahni thu a thlak dang hi a Pathian thu lova, a thiang lo hrim hrim a ni a ti. District Profile an puitlin theih nana an thawhrimnaah District Research Officer leh Staff te chungah lawmthu sawiin tun aia nasa zawka tan la zel turin a fuih nghal bawk a. Registrar of Births & Deaths a thawktu zawng zawngte dikna vawng tlat chunga hna thawk tur leh Training chu hlawkthlak taka hmang turin a chah bawk.

Khualzahawm Pi Gracy L. Bawihtlung, Chief Judicial Magistrate, Mamit pawhin thu sawiin Births & Deaths a hun taka Register loh pawi theihzia leh ram leh khawtlanga a nghawng theih hrang hrang sawiin a bik takin Death Certificate chuan Court-ah nasa takin thil a ti thei a ni a ti a. Mihring la thi miah lo thi anga Register leh thi tawh si la thi lo anga Register hian thurochhiah leh ro insem chungchangah nghawng thui tak a neih theih bakah thilsual titu, man ngei ngei tur pawh zalen taka an awm theih phah avangin thawktute fimkhur turin a chah a. Hei bakah hian kalkhawmte hnenah hian Registration of Births & Deaths Act chungchang sawizauna a nei bawk.

Training hi Pu Lalbiaksanga, Joint Director, Economics & Statistics Department chuan pein a duh apiangte tan zawhna leh chhanna hun hman nghal a ni bawk.

Vawiin Programme hi Pu Malsawma, District Research Officer, Mamit chuan kaihruaiin Mamit khawpui chhung leh District chhung khaw hrang hranga Registrar of Births & Deaths a thawktute an tel tha hle a ni.