Vawiin khan Serchhip DC Conference Hall ah Bawrhsap Pi Sangchhin Chinzah chuan, sawrkar laipui chhung tin ten Electric connection an neih theihna tura hmalakna thar- Pradhan Mantri Sahaj Bijli Har Ghar Yojana (SAUBHAGYA)  Scheme chu a hawng.

A hawnna thusawiah Pi Sangchhin Chinzah chuan, India sawrkar chu sawrkar chak tak, khua leh tuite ngaihsak tak a nihzia a lo lang leh thin a. Vawiin a SAUBHAGYA scheme pawh Electric la nei lo zawng zawngten man tlawm taka eng an neih theihna tur ruahmanna ani. He hmalakna hi Serchhip District ah hlawhtling taka kalpui a nih theih nan Power & Electricity Department a thawktute leh khawtina khawtlang hruaitute, tlawmngaipawlte thawh hona tha a pawimawh hle dawn a ni, a ti. Pi Sangchhin Chinzah hian SAUBHAGYA Booklet tlangzarhna a nei nghal bawk.

He hun kaihruaitu Pu M. Lalhmingthanga, EE, P&E Serchhip Power Division chuan SAUBHAGYA hi scheme thar a nih avangin engkim a chinchhuakin kan la sawifiah thei lova, amaherawhchu he scheme in a tum ber chu kum 2011 chhiarpui report atanga lo lang chhuak, India ram chhunga electric la neilo chhungkaw Nuai 750 ten electric connection an neih theih nana hmalakna a ni a. Sawrkar laipui chuan hemi atan hian Rs. 16320 crore dahin Prime Minister Pu Narendra Modi ah September, ni 25, 2017 khan a hawng a. Mizoram sawrkar pawhin November, 2017 atang khan hma la tannin vawiina State level leh District zawng zawngah a rualin kan hawng (launch) thei ta a ni, a ti a. Serchhip District dinhmun tlangpui leh hmalakna tur ruahmanna an siam tlangpuite  tarlangin, heng ruahmanna te hi a duh apiang tan a Office ah en theih a nih thu a sawi bawk. Pu M Lalhmingthanga hian Serchhip District mipuite chu he scheme hlawhtling taka kalpui a nih theih nana thawhpuiah a sawm a ni.

SAUBHAGYA in a tum berte chu; chhungkaw tin hnena electric connection awlsam zawka pek te, chhungkaw khawsak harsa zualte hnena a thlawna electric connection pek te, inkalpawhna tha neilo khua hnena Ni eng chakna hmanga electric pek te a ni.

SUABHAGYA hawnna inkhawmah hian Pu Otto K. Lalchhuanawma, SDO, P&E leh P&E Department a thawktute, District Officer engemawzat leh khawtlang hruaitute, tlawmngaipawl hruaitu leh chanchinbumite an tel a ni.