Vawiin khan Chhimveng YMA Hall Mamit-ah Remna Ni lawmna inkhawm neih a ni a, Pu Lalrinsanga, Minister, Agriculture etc. chuan khuallian niin a hmanpui a, Er Lalzirliana, Mamit Bialtu MLA leh Dr ZR Thiamsanga, Champhai North MLA te chu khualzahawm an ni.

Minister Pu Lalrinsanga chuan kalkhawmte Remna Ni chibai bukin vawiin nia remna ni kan hman chu party mal ta nilovin mizo zawng zawngte ta a ni a ti. Mizoramin rambuai avanga harsatna tam tak a tawh laia, zalenna hmel kan hmuhna tura luchhum banchhum huama sul lo sutu kan hruaitu hmasate hmalakna chu fakawm a tih thu a sawi a, mizote chu Pathian hriat leh zawnchhuah ram kan nih angin tuna kan dinhmun mai nilo, Economics Independent kan hma maia awm chu thleng turin mimal leh Sawrkarin theihtawp chhuaha tan kan lak a tul thu a sawi.

Minister chuan kan ram leh hnam a maha a din ve theihna tur chuan kan intodelh hmasak a tul a, chumi tur chuan Agriculture Department kaltlangin kawng hrang hranga hma lak chhoh tum niin rampawn atanga kan lakluh, kan lo mikhual rei tawh tak takte chu thlakthleng tura ruahmanna siam chhoh mek zel a ni a ti. Mamit District chu Potential Area a nih avangin ram leilung hausakna hmang tangkai tura hmalakna hmun tur anih dawn avangin hmasawnna thlenna hmun ni tura inbuatsaihna nei tura chahin,  Kawlphetha lama harsatna lian tak Mamit khawpuiin a tawh thin chu hreawm a tihpui tak zet thu a sawia, chutichunga mipuite phunnawi lova an awm thin chu fakawm a tih thu a sawi,  a theih ang anga hmalakpui a tum thu a sawi bawk a ni. 

Pu Lalrinsanga chuan Mizoram Sawrkar chuan a inngahna angin Pathian leh kan ram tan a thawk zel dawn a,  tumah thlei bik emaw duhsak bik neih a remlo a ni a ti. Kan Chief Minister zahawm tak ruahmanna in Aizawl khawpui tawt lutuk tihzia awmnan Rs nuai 1000 chuang Parking House Support Shemes ( PAHOS)  Parking siamna atana hman a nih thu a sawi a. Chu chuan mimal motor dahna neilo kawngpui dunga dahte avanga Traffic lama harsatna a thlen thinte a tihziaawm a beisei thu a sawi bawk a ni.

He hunah Bialtu MLA Er Lalzirliana, leh  Dr ZR Lalthiamsanga, Champhai North MLA te pawhin thusawina an nei bawk.

Remna Ni lawmna pual inkhawm hi Pu H. Lalthlengliana, President Mamit Center Block chuan a kaihruaia, Rev Rammawipuia Pachuau in hunserh hmangin zaithiam tak tak te'n zaiin mipui an awi a, tlailamah Remna ni lawmna ruai theh a ni bawk.

Pu Lalrinsanga, Agriculture Minister hian tukin khan Mamit District Potential Area Darlak leh Bawngva  a tlawha, Minister hi Er Lalzirliana, Mamit Bialtu MLA leh Dr Z.R Thiamsanga, Champhai North Bialtu MLA bakah Agriculture Director leh hotute bakah District Officials te'n an tawiawm a ni.