Vawiin chawhnu khan Thingsulthliah Community Hall-ah Remna Ni vawi 33-na urhsun taka hman a ni a, bialtu MLA, P&E Minister ni bawk Pu R. Lalzirliana'n khuallian niin a hmanpui.

Remna Ni lawm tura mipui kalkhawm te chu Pu R.Lalzirliana chuan Remna Ni anih angin mimal nunah mi remloh kan nei emaw, chhungkua, khawtlang, kohhran leh hnathawhna hmunah te inremlohna a awm anih chuan inrem tum ila, midangin min rem theilo anih pawhin kan Pathian thu in min phut angin keimahni lam talin rem tum ang u tiin thu a chah a. Remna kan neih theih na tura inhlantute, remna kan neih theih na tura inphahhniamtu hnam sipaite hi kan hnam rohlute an ni a ti a, an lo tawrh tawhna leh an lo inhlanna zawng zawngte kalsan a har turzia kan chhut thiam phalo, heti chunga kohhran leh khawtlang bakah mizo mipuite ngenna zah a an inphahhniamna hi sawihnawm chi a nilo a ti a, Remna Ni anih ang ngeia mi zawng zawngin party emaw, mimal thil emaw dah hrang a thukhat vuan chunga kan lawm theih a pawimawh a, mizo mipui zawng zawng leh kohhran leh khawtlang hruaitute tawngtaina chhanna avanga remna nei thei kan ni tih hi kan hriat fo a tul a ti bawk.

Remna Ni lawmna inkhawmah hian hnam sipai rammu la dam zing ami pali lai an tel thei a, inkhawmna neih zawh hian Remna Ruai theh a ni.