3724/2023-2024

Mamit 8th February, 2024 : Tukin khan Mamit Field vengah Road Safety Month hawnna neih a ni a. Pu V. Laldinsanga, Addl DC chuan a hmanpui.

Pu V. Laldinsanga chuan lirthei a kum tellin a pung chho ta a, dan leh thupek kan zawm that hian chetsualna tamtak kan pumpelh thei a ni tiin, traffic an din loh avanga dan zawm ngailo anga kan ngai thin chu a thalo hle a, engtiklai pawhin dan chu dan a nih angin kan zawm a tul a ni a ti. Lirthei khalhtu leh ke a kawngpui zawhtute'n dan zawm tur chi hnih kan nei a, hengte hi tha taka kan zawm tlan chu kan himna tur a nih angin Road Safety Month kan hman mek chu District chhung mipuite'n dan leh thupek kan zawm thar lehna atana hmang vek turin mipuite a sawm a ni.

Pi Lalthangpuii Pulamte, SP Mamit kaihruaina-in lirthei leh a khalhtute himna tura thutiam kalkhawmte hian an nei a ni.

He hun hi Pu Jerome Lalbiakdika, DTO Mamit chuan a kaihruai a, Mamit khawpui chhunga Sawrkar Department hotute, Lirthei khalhtu Association hrang hrang, Tlawmngaipawl aiawh leh khawtlang hruaitu aiawhte an tel a ni.

District Road Safety Committee-in ruahmanna a siam angin Road Safety Month denchhen hian Lirthei leh a khalhtute tana fimkhurna tur hrang hrangah hmalak chhoh a ni dawn a, Road Safety Awareness Drive, DIET, Govt. Mamit College, Govt Mamit High School leh Higher Secondary School-ah te neih a nih dawn bakah No Tolerance Drive ( 12th -17th) February chhungin Lirthei check runpui DTO Mamit kaihruaina-in Police leh Excise te nen neih a ni bawk ang.