Nimin (29.10.2019) khan Chhimveng YMA Hall Mamit-ah National Action Plan for Demand Reduction (NAPDDR) hnuaiah District Institute of Education & Training (DIET) Mamit buatsaihin nikhat awh Awareness Programme for School Community Members on Prevention of Drug Abuse neih a ni a. Pu Jacob Lalawmpuia, Addl. DC Mamit chuan khuallian niin he hun hi a hawng.

Khuallian chuan kan ram leh khawtlang min tibuai mektu ruihhlo chu theihtawpa kan do tlan a tul a. Ruihhlo chi hrang hrang lak ata fihlim tur chuan chhungkaw tina nu leh pate kan pawimawh a. Kan fate kan enkawl dan leh kan chhungkaw inrelbawl danin nasa takin kan khawtlang nun leh ram leh hnam thlengin a nghawng thei a ni a ti. Ruihhloin min tihbuai mekna ata kan zalen theih nan uluk taka ngaihtuahna seng turin kalkhawmte a sawm bawk.

He hunah hian mithiam sawm bikte'n kalkhawmte zirtirna pein Prevention of Drug Substance Misuse tih thupui hmangin Pu K. Malsawmhlua, Lecturer DIET Mamit chuan zirtirna a pe a. Mental Health and Substance Misuse tih thupui hmangin Pi R. Lalruatsaki, Lecturer DIET Mamit chuan zirtirna pein Pi H. Lalthanpuii, Lecturer, DIET Mamit-in Myths & Misconception On Substance Misuse tih thupui hmangin zirtirna a pe a. Dr. Francis R. Lalthantluanga, District Hospital Mamit-in Substance Related and Addictive Disorder/ Effect of Drug Abuse tih thupui hmangin kalkhawmte zirtirna a pe bawk.

He hun hi Pu Lalsangvuana, Principal DIET Mamit-in kaihhruaiin Mamit khawpui chhunga khawtlang hruaitute, tlawmngaipawl hrang hrang aiawhte leh Kohhran hrang hrang thalai hruaitute an tel a ni.