Vawiin khan DC Conference Hall, Mamit-ah Dr. Lalrozama, IAS, Mamit District Bawrhsap hovin Mamit khawpui chhunga Sa rate chungchang ngaihtuaha thutkhawm a ni.

Mamit Bawrhsap chuan Sa chu mi zawng zawng huap, chhungkaw tin mamawh a nih angin thianghlim leh hrisel tak mipuite'n an lei theih nan leh a Rate chungchangah pawh mumal zawka kan kal theih nana Meeting ko an nih thu a sawi.

Meeting-ah hian Sa zawrhna hmun mumal zawka kalpui a nih theihna tur te, Sa thianghlim leh hrisel bakah a buk tling ngei kan lei theihna turin District Level atang pawha a kaihhnawih Department-te lo sawipui a, hmalak tum a nih thu District Bawrhsap hian a sawi bawk.

Mamit khawpui chhung Sa Ser Association OB-te hian an Association chhunga tel duh silo, mimal anga Sa sat thin an awm chu ngaihmawhawm an tih thu sawiin hemi kawnga hmalakpui tur hian District Bawrhsap chu an sawm a. Hei hian Sa Rate chungchangah pawh thil thui tak a hril thei dawna an hriat thu an sawi bawk.

Sa Rate chungchangah hian inang tlang leh rualkhai zawka kan kal theih nan District thuneitute atanga Order chhuah a ni dawn a. Chu chu mipuite leh a zuartute paw'n kan zawm tlan ngei a tul dawn thu Meeting-ah hian tarlan a ni.

Vawiin Meeting-ah hian Mamit Sa Ser Association, Chairman, Jt. VC, DCSO Mamit bakah SDIO aiawh an tel a ni.