Vawiin khan BSNL huaihawtin Mamit Chhimveng YMA Hall-ah "Sabka Saath Sabka Vikaas Sammelan" Programme hman a ni a. Pi Lalbiaksangi District Bawrhsap chuan khuallian niin a hmanpui.

Khuallian Pi Lalbiaksangi chuan thu sawiin vawiin  Programme chu Sorkar laipui kum 3 tlin lawmna denchhena buatsaih a ni a. Sorkar laipui Schemes hrang hrang puanzarna hun atana hman a ni a ti a. Schemes 80 lai mai a hlui leh a thar mipuite hamthatna atan tuna Central Sorkar-in a kalpui mek dan chungchang hrilhfiahna a nei bawk. Mamit District chhunga khaw 87 te chu zun leh ek thlahdah awm lohna Open Defication Free (ODF) ah October Ni 2 hma ngeia puan hman turin Department hrang hrang te'n an buaipui mek a ni a ti a. Mamit khawpui chhung bik (Town Area) chu April Ni 18 khan Open Defication Free (ODF) a puan a nih tawh thu sawiin kan District chhung hriselna lama kan tlakhniamna khua Western belt a awm Silsury, Ragiv Nagar, Hnahva, Andarmanik leh Marpara-ah te hri danna  pek thin niin mipuite hriselna kawnga hmasawnna turin hmalak mek a nih thu a sawi bawk.

Pu H.Lianzela Addl.DC pawhin thu sawiin Central Sorkar Schemes hrang hrangte chu History a nih hmain lo chhinchhiah a, vawng tha tlat turin a chah a. Hei hian zirlaite chu Uniform hak tawh loh hnuah pawh Competitive Exam hmachhawn duhte tan nasa taka a puih dawn thu a sawi. India ram chu Democratic Republic kan nih angin kan ram hruaitute chu mipuite'n kan thlang thin a, kan ram Prime Minister te chu an hunlai theuhah mi ropui ber ber an nih vek thu a sawi a. Kan ram hruaitute hmalakna zarah India ram chu khawvela Economy thang chak ber dinhmunah tunah hian kan din mek thu a sawi bawk.

Vawiin Programme-ah hian Central Sorkar Schemes hrang hrangte Video hmanga thlirho a nih bakah Mamit Cultural Organisation (MCO) te'n Mizo hnam lam chi hrang hrang entirna an nei bawk a. Pu Dada Khalandar, DGM, BSNL chuan kal khawmte hnena lawmthu sawina neiin Programme hi tih tawp a ni.