Ministry of Women and Child Development, Social Welfare Department, Govt of India bultumin Vawiin khan Sakhi One Stop Centre chu Pu Lalrindika Sailo Building, Mamit Field vengah Dr Lalrozama IAS District Bawrhsap, Mamit chuan a mamawh tute'n an pan turin a hawng.

Dr Lalrozama chuan Mamit tana a vawikhatna tur Sakhi One Stop Centre hawn a ni ta chu thillawmawm tak a nih thu a sawi a, OSC hawn a nih theihnana ngaihtuahna sengtu zawng zawngte chungah lawmthu a sawi. Sakhi One Stop Centre chu hmeichhia hleilenna chi hrang hrang avanga harsatna tawkte tana, lungmuang taka an  hahchawlhna tur a nih angin hetiang harsatna neite chuan inthlahrung miah lova, taksa rilru damna an chan ngei theihnana pan turin a sawm a. Chutihrual chuan Hmeichhiate dikna leh chanvo zahsak chunga, manganga helai hmun pan ngailo tura siamtu nih tum theuh turin kalkhawmte a sawm a ni.

Pu Shashank Jaiswal, IPS pawhin thusawiin Mamit tana chhinchhiah tlak ni tura Sakhi One Stop Centre hawn a ni ta chu hmasawnna leh thil lawmawm tak a nih thu a sawi a. India ramah Hmeichhia te'n chhan hrang hrang avangin harsatna an tawk thin a, India Sawrkar chuan Hmeichhiate dinhmun chawikana tanpui chu a ngai pawimawh hle a ni a ti. Sakhi One Stop Centre-a thawktute chu Police te nena thawhhona tur tulah englai pawha an in hawn reng thu a  sawi bawk.

Sakhi One Stop Centre hawnna hun hi Pi Lalrinpuii District Programme Officer, ICDS chuan kaihruaiin Pi Lalruatpuii, District Centre Administrator, One Stop Centre, Mamit chuan OSC in a tum leh hnathawh tlangpuite a tarlang a, he Centre pantute tan hian ni leh zan 5 a awm theih dawn a, Fa nei tan pawh an fate hruai tel theih a nih dawn thu a sawi. Hmeichhia hleihlenna avanga harsatna tawkte khaichhuak tura tanpuina tur point hrang hrang pasarihte a tarlang bawk a ni.

Vawiina hawn tak Sakhi One Stop Centre ah hian Centre Administrator hovin thawktu pariat an awm mek a.Bed Room (5 beds), Counselling Room, DCA Room, Kitchen leh Bathroom a awmin,  Guidelines-in a phut angin Office bungrua hrang hrang Refrigerator, Computer, Printer, Laptop, Almirah, Inverter bakah Chair leh Dawhkante a awm bawk a ni.

He hunah hian Mamit khawpui chhunga Heads of Department, Tlawmngai pawl hrang hrang aiawh, khawtlang hruaitute bakah thutharthehdarhtute an tel a ni.

Attachment

  • Loading attachment...