Vawiin khan Chhimveng YMA Hall, Mamit-ah Planning & Programme Implementation Department leh District Planning Committee, Mamit District buatsaihin Sensitization Workshop on District Level Planning neih a ni a. He Sensitization Workshop hi Pu Vanlalngaihsaka, Chairman, District Planning Committee, Mamit District Bawrhsap ni bawk chuan hawnna neiin he he hi a kaihruai.

Pu H. Lianzela, Dy. Secretary, Planning Department chuan Key Note address leh Presentation pein United Nations chuan Sustainable Development Goals Sawmpasarih (17) lungrual taka United Nations ram 193-in an tihhlawhtlin turin a kalpui mek a. India ram chu UN Member pawimawh tak a nih angin SDGs implement tur hian National leh State Level-ah hmalak mek zel a ni a ti. SDGs chu mipui tan a ni a, mimal tin thleng phak hmasawnna thlen chu a tum bulpui a nih avangin "localization" chu SDGs implement-na atana thupui ber a ni a. SDGs theme pui ber chu "no one will be left behind" tih a ni. Hmasawnna huapzo tak leh ngelnghet taka a kal theihna atana ruahmanna siam leh tihhlawhtlin chu Sorkar hna leh ram rorelna atana pawimawh ber a ni tih chu vawiin workshop-ah hian kan zirchhuah a tul hle a ni a ti bawk.

Pu B. Lalrintluanga, Dy. Adviser, Planning Deptt chuan Sustainable Development Goals chungchangah zirtirna a pe a. Sustainable Development leh Sustainable Development Goals (SDGs) awmzia, Mizorama SDGs dinhmun leh kan thlen chin, District/ Village Level-a SDGs kalpui dan tur hrang hrangah chipchiar takin zirtirna a pe.

Vawiin Sensitization Workshop hi hun hnihah then niin 2nd Session hian Pu B. Lalrinhlua, RO (DPC) Eco & Statistics chuan Developing Database in the Statistical Cell of Line Departments tih thupui hmangin Statistical Database awmzia, Statistical Database tha neih a harsatna chhan leh Database tha neih theih dan tur, Economics & Statistics Database, Developing Database in the Statistical Cell of Line Departments, Developing Database of Departments at the District level, Database pawimawhna bakah SDGs leh Database inlaichinna a sawi a. Pu R. Lalfamkima, Scientist, Science & Technology chuan Application of Remote Sensing and GIS for District Level Planning tih thupuia hmangin kalkhawmte zirtirna a pe bawk.

Vawiin Sensitization workshop-ah hian zawhna leh chhanna bakah sawihona tha tak neih a ni a. DPC awmze neia a kal zawk theih nan tihchangtlun a, a tihtur chin bituksak a, thuneihna-a kawng engkimah thuam nise, a hranpaa Secretariat Office pawh nei turin rawtna siam a ni a. DPC Chairman atan hian District Bawrhsap nge mipui thlantlin MLA tha zawk ang tiin sawihona neih a ni. DPC hnathawh tur hi dan siamtute'n Legislative Assembly-ah Notification chauh lovin Pass nise tih sawiho a ni bawk.

He hunah hian Mamit District Planning Committee Member zawng zawng, Mamit District chhunga Heads of Office zawng zawng bakah MJA, Mamit-te an tel a ni.