Vawiin khan LAD Conference Hall Mamitah Er.C.Lallunghnema, Chief Engineer Zone - I, PHED chuan khuallian niin Mamit District tana hman tur Swachh Suvekshan Grameen (SSG) 2018 hawnna a nei. 

Khuallian chuan faina lama hmalakna Swachh Survekshan Grameen hawn theiha awm chu lawmawm a tih thu a sawi a. District chhunga thingtlang khuate chu thianghlimna kawngah ke rual taka kan pen a, faina chu midangte tih bik tura dah lova keimahni mawhphurhna theuh a ni tih hre thar turin kalkhawmte a  chah a, he Scheme hlawhtlinna tur chuan tan rual a pawimawh thu a sawi bawk. Swachh Survekshan kalphungah hian mipuite atanga Feedback a pawimawh dawn thu sawiin he scheme hnuaia kan hmalak tawhnate rawn endiktute hmuh dan leh mipuite atanga feedback an hmuh dan chuan kan District chhung thingtlang khaw hrang hrangte min tehna Point hmuh a hril dawn a, chuvangin mipuite'n faina kawnga kan hmalaknate leh daipawna inthiar awm lohna, Open Defecation Free kan nih theihna turin Department hmalaknate chu a endiktute lo hrilh thin tur leh tanpuina dawn ringawt beisei lova thianghlimna kawnga mahni theih ang tawka hmala zel turin a chah bawk. Kan District chhung a fai leh fai loh rawn endik tur hian Hindustan Thompson Pvt.Ltd rawih an ni a. An zawhnate tha tak leh a nihna taka lo chhang thin turin District mipui zawng zawngte a ngen nghal bawk a ni. Mizo hnam chu thianghlimna ngaina hnam kan nih angin Biate khua chu thianghlimna kawngah Best Innovation Practices in North East Zone-a lo thlan tawh a nih thu sawiin chutiang dungzui chuan Mamit District chhunga khaw hrang hrangte pawh tan la a, faina leh thianghlimna kawnga mahni theih tawka hmala zel turin a chah a ni.

He hunah hian Er. Lalzuala, Sub Divisional Officer, PHED, Mamit chuan Power point Presentation hmangin Mamit District chhung faina leh thianghlimna kawnga an hmalak tawhna leh hmalak zel dan tur a lem nen a entir a. Mamit District chhung chu pawnlera inthiar awm lohna, Open Defecation Free-a puan a nih theih nan hian Individual Household Latrine (IHHL) 4063 sak tawh a nih thu tarlangin Community Sanitary Complex 10 sak tawh a nih thu leh 2018-19 chhungin 14 sak belh leh an tum thu a sawi a. Solid & Liquid Waste Management hmun 4 ah sak tawh niin 2018-19 chhungin 18 sak belh leh tum a nih thu a tarlang bawk. 

SSG hnuaiah hian Component 3 awmin Citizens' Feedback ah 35%, Service Level Progress ah 35℅ leh Direct Observation ah 30% te an ni.

SSG hawnna hun hi Er. Lalrammawia, Superintending Engineer, PHED, Rural WATSAN Circle, Aizawlin kaihruaiin Er. Lalzawmliana, Sr. Executive Engineer, PHED Mamit WATSAN Division-in kalkhawmte hnena lawmthu sawina a nei a ni.

 

Attachment

  • Loading attachment...