2153/2025-2026

Dated Mamit the 17th of September, 2025 : Tukin khan Urban Development & Poverty Alleviation Department leh Public Health Engineering Department hmalakna hnuaiah Swachhata Hi Seva - 2025 (Faina kawnga hmalakna) khuhhawnna Pu K.Laltlawmlova, District Bawrhsap chuan a nei.

District Bawrhsap chuan Swachh Bharat Mission hnuaia hmalakna pawimawh tak Swachhata Hi Seva - 2025 kalpuina chu Sawrkar laipui ruahmanna dung zuiin Mamit District-ah pawh theihtawpa kalpui a ni dawn a, he hmalaknain a tum ber chu India khua leh tuite'n faina, thianghlimna leh hriselna tha zawk nei tura hmasawnna kan neih nana hmalakna a nih thu a sawi a. Faina kawnga hmalaknaah chung lam atanga kalpui niloin a bulthut atanga fai tura kan beih chu Swachhata Hi Seva- 2025 hian a tum a ni a ti. Mizoram chu hmun thengthaw leh boruak nuam tak a nih angin ram pawn atanga khualzin lokalte pawhin tlawhnuam an tih a ni thin a, chuta an mit la hmasa ber chu kan fai leh fai loh a ni thin a, faina kawngah campaign kalpui chhung chauh nilo, engtik lai pawh fai reng nih chu kan tum tur a ni a ti bawk.

Tukin Swachhata Hi Seva kick-off hi Pi Helen Saibuangi, Sr. EE, PHED chuan kaihruaiin, Swachhata Hi Seva - 2025 hnuaia hmalakna kalpuina tur hrang hrang a tarlang a ni.

Swachhata Hi Seva - 2025 hnuaia hmalakna atan hian Mamit Bazar veng atanga Charkawn thleng bawlhlawh chharfaia hnatlang neih zui niin Mamit Charkawn-ah kharna hun hman a ni a, Pu C. Lalrinmuana, DFO chuan kaihruaiin, Pi R. Lalhmangaihzuali, DUDO chuan lawmthu sawina a nei bawk.