2154/2025-2026

Lunglei, 2025 Mimkut thla ni 17: 2 Mizo Battalion National Cadet Corps (NCC)-in 2nd Battalion Mizoram Armed Police (MAP) Complex, Luangmual, Lungleia ni 10 awh Combined Annual Training Camp (CATC-90) an buatsaih chu nimin khan hlawhtling taka zawh fel a ni.

CATC-90 hi September ni 8, 2025 khan ṭan niin, Mizoram chhim lama sikul leh college hrang hranga NCC Junior Division (JD), Junior Wing (JW), Senior Division (SD) leh Senior Wing (SW) aṭangin cadet 247-in camp hi an chhim a. Ni 10 chhung hian cadet-te chuan sipai lâm (drill), silai leh ralthuam chelek, ram lem (map) en dan, ramhnuaia chettlat dan, infiam leh taksa sawi zawi, hruaitu ṭha ni tura thil pawimawh leh khua leh tuite mawhphurhna hrang hrang an zir a. Mi thiam sawm bikte nen thupui hrang hrang zir hona leh sawi hona hun hman ṭhin a ni bawk.

CATC-90-ah hian 20 Assam Rifles Commanding Officer Colonel Jaswinder Singh Rana chuan cadet-te hmaah 'Operation Sindoor' chungchang leh sipai (Armed Force)-a luh dan sawiin, Lunglei District Superintendent of Police Pu J. Lalmuankima leh 2nd Bn MAP Commandant Pu Francis Lalnuntluanga Ralte te'n cadet-te fuihna thu ṭha tak tak an sawi a. Lunglei DIPRO Pu C. Lalhruaitluanga'n media pawimawhna leh media hman dan ṭha zirtirin, 20 Assam Rifles RMO-in hriselna leh thianghlimna chungchang te, Excise & Narcotics Department official-te'n vaihlo leh ruihhlo ṭhat lohzia leh Traffic Police te'n traffic kaihhnawih dan leh himna tur hrang hrangte an zirtir bawk.

Camp chhung hian volleyball leh football hmanga infiamna leh inelna chi hrang hrang buatsaih a ni bawk a. Vibrant Village Programme hnuaiah cadet-te leh NCC officer-te chuan Lunglawn khawtlang mipuite nen hun hmang hovin, infiamna leh thu sawi hrang hrang kal tlangin vantlang nun ho dan te, vantlang rawngbawlna leh ram inpumkhatna pawimawhzia te an zir ho bawk.

Camp kharnaah Camp Commandant Colonel Sagar K. Mohanty chuan cadet-te chu an thathona, thu awihna leh hlawhtlinnaah a lawmpui thu sawiin, CATC-90 buatsaih nana an hmun hma leh hmanruate phal taka hmantirtu leh zo taka dawltu, 2nd MAP Commandant leh a thawhpuite chungah lawm thu a sawi bawk a. Camp chhunga inelna leh thil tihna hrang hranga ti ṭhate lawmman sem a ni a. Cultural programme hlimawm tak nen camp hmawr hi bawk niin, cadet-te'n hnam lam, hnam zai leh an thiam thil chi hrang hrang an entir a ni.