2155/2025-2026

Siaha the 17th September 2025: Vawiin khan Ram pum huap Faina Beihpui thlakna, ‘Swachhata Hi Seva’ - 2025 campaign khuhhawnna (roll-out programme)chu Bawrhsap Pisa tual zawl, Siaha-ah neih a ni a, UD&PA District Project Officer, Pu Vanlalchhuanliana, SDO (S) ni bawk kaihhruaina hnuaia neih niin District Bawrhsap Pu VL Hruaizela Khiangte chuan he campaign khuhhawnna hi a nei a ni.

Campaign hawngtu Pu VL Hruaizela Khiangte chuan, Swachhata Hi Seva chu Kum 2017 atang khan Ram pumah kumtin hman thin a ni a,mipuiin faina leh thianghlimna chu mahni mawhphurhnaa ngaia, an tih tura an dah tlat theih nana ruahman a ni, a ti.

Siaha chu Mizoramah District upa pawl tak a ni a, faina chungchangah pawh harh hmasa pawl a ni tiin kumin Mizoram Cleanliness Competition-ah pakhatna nih chu a phu hle a, ni thei turin mitin theihtawp chhuah a tul a ti. Fai turin sum tam a ngai lo a, rilru a pawimawh ber a, bawlhhlawh bawm hman tangkaite leh mahni in leh a chhehvel tihfai that chuan Khawtlang a fai mai a ni, a ti bawk. Tanrual a pawimawh thu pawh sawiin Bawrhsap chuan faina chungchangah nasa takin Siaha chuan hma a sawn tawh a, Sawrkar department hrang hrang, tlawmngai pawl leh mipui tanrual vang a ni tiin nasa lehzuala tanrual a tul takzet a ti bawk a ni.

DC Pisa tual zawla hawnna programme hman zawh hnu hian Faina kawng zawh (cleanliness rally) neih nghal a ni a, DC pisa atangin Siaha Bazar Traffic Point thleng kawngpui leh a chhehvela bawlhhlawh chharna hnatlang neih nghal a ni.

Siaha Bazar Traffic point a hun tawi hmannaah Er Viasai, Sr EE PHED, chuan thusawina neiin sawrkar chuan sum tam tak sengin faina chungchangah hma la thin mahse mipuiin faina chu mahni mawhphurhnaa la a, an nunpui tlat loh chuan awmzia a nei dawn lo a, kalkhawmte chu sawrkar hmalaknate thlawp tlat turin a sawm nghal bawk a ni.