Vawiin khan ramchhung hmundangte rualin International Day of Older Persons (Upa Ni) chu Siamliana Hall Mamit-ah District Legal Services Authority, Mamit District huaihawtin hman a ni a. Dr Lalrozama, IAS, District Bawrhsap chuan khuallian niin a hmanpui.

Dr Lalrozama chuan Ram inrelbawlna kawngah naupang zawkte'n kan kaihhruai a ngaih chang a lo awm ta a, kum lama upa zawkte chu finchhuah an ngaihna apiangah inthlahrung hauh lova finchhuah turin a sawm a. Mi hmantlak leh hlawhtling kan tihte chu kum upa zawkte atanga thurawn la leh inzir peihte an ni thin a ti. Thangthar zawkte'n kan entawn leh kan tluklohna ber che u hun vawndik leh ngaihpawimawh kawngah hian a ni tiin vawiin Upa Ni hmang tura a hun taka mi thahnem tak kalkhawmte chu zahna leh duhsakna chibai a buk a ni.

Pi Gracy L. Bawitlung Secretary, District Legal Services Authority, Mamit  pawhin Upa Ni hmangtu kum upa zawkte duhsakna chibai bukin kum upa zawkte chu ngaihven leh ngaihsak an nih theih nan an pual bika ni hman a nih dan a sawi a. Mihring kan lo changkangin hma kan sawn zel a, kan dam hun chhung pawh a lo rei ve ta zelin kum upa zawkte chu inthlahrung miahlo-a an hun, an nun hmang turin a chah a. Upate chu ina awm a, thingpui hang pek nghaka awm mai mai tur nilovin chakna leh theihna kan la nei ve a ni tih lantir nan vawiin Upate Ni puala kawngzawh pawh buatsaih a nih thu a sawi. Pi Gracy hian kum 80 tling chinte tan chawimawina pawisa fai mi 20-te hnenah a hlan bawk a ni

Upate Ni hmanna hun hi Pu C.L Thantluanga, President MUP Venghlun chuan a kaihruai a. Pu Z. Sangliana, President, MUP Mamit District Headquarters chuan lawmthu sawina a nei bawk.

Vawiin Upate Ni pual hian Mamit High School veng atanga Charkawn thleng kawngzawh a ni a. Chawhnu hunah Dr H. Lalrinfela Medicine, District Hospital Mamit hovin hriselna lama inzirtirna bakah harsatna an neihte zawhna leh chhanna hun hman zui a ni bawk.