Mizo Upa Pawl Hqrs Lunglei leh Lunglei Distict Legal Services Authority te tangkawp buatsaihin vawiin khan Convention Centre Lungleiah Khawvel Upa te Ni pualin hun hman a ni a, Lunglei D.C Pi K.Lalrinzuali khuallian a ni.

Upa te Ni lawmna inkhawm hi MUP Hqrs Lunglei President Pu B.Lalchungnunga'n a kaihruaia, khuallian D.C Pi K.Lalrinzuali chuan thu sawiin, Khawvel Upa te Ni hi UNO in a puan a ni a, a chhan chu khawvela upa te hi dahhniam leh ngaihnep mai an nihloh na tur leh thangthar zawk ten chawisan nachang an hriat theih nana he ni hi puan a ni a ti. Upa te chu tawnhriat tam tak nei tawh an nih avangin an tawnhriat te chu ram leh khawtlang hmasawnna atan thangthar te finchhuah nan hmang thin se a duh thu D.C chuan sawiin, kum a lo upat a, taksa leh rilru te a lo chak tawhloh avanga in kiltawih mailo leh thalai zawkte bulah pawh inthlahrung miah lo a, khawsa thin turin a chah a. District Level rorelna kawng hrang hrangah pawh Mizo Upa Pawl hruaitute uapna avanga kal sual an la neilo chu lawmawm a tih thu a sawi bawk. Vawiina kan ram leh khawtlangin hmasawnna tam tak a neih te hi upa zawk ten an that lai huna an theih ang anga an thawh rah thangthar ten kan seng mai a ni tih hriaa thangthar naupang zawkte hian Upa te hi chawimawi leh zah nachang kan hriat thar leh a pawimawh hle a, Upa te chu thangthar te tan zirtirtu, Nu leh Pa an nihna hi engtikahmah a a reh tawh dawn lo a ni a ti bawk.

He hunah hian khualzahawm Pi Julie. Lalrinzami CJM & Secretary DLSA pawhin Upa te hlutna leh an pawimawhna thangthar zawk ten hriat chian a pawimawh thu leh upa te fuihna thu a sawi bawk a ni.

Vawiina Upa te Ni lawmna hunah hian kalkhawm te atangin Kum 80 chin chunglam mi thahnem tak hnenah lawmman hlan an ni. Tun dinhmunah Mizo Upa Pawl Hqrs Lunglei hnuaiah hian Unit 133 awmin, Member 10076 an awm mek a, Kum 100 tling member 7 an awm bawk a ni.