522/2022-2023
Mamit 18th May, 2022 : Vawiin khan District Agriculture Complex-ah Vaimim eichhetu Fall Army Worm laka inven dan tur inzirtirna, a invenna damdawi insecticide (Emamectin Benzoate) semna leh a damdawi hman dan inzirtirna Pu Zokhuma Varte, District Agriculture Officer, Mamit kaihhruaina-in neih a ni.

He hunah hian Pi Vanlalhriati, Asst. District Agriculture Officer, Mamit chuan Fall Army Worm chungchang sawiin Kum 2019 atangin Mizoram-in FAW kan hmelhriat tan a. Mamit District chhung Khaw 29-a Kuthnathawktu mi 600 velin he FAW avanga harsatna hi an neih tawh thu sawiin Phengphehlep atanga insiam pangangte hian Vaimim an ei chhiat thin avangin Vaimim hmuna Phengphehlep kan hmu anih chuan thah zel a that thu a sawi. Phengphehlep tui/ Pangang note te chu Vaimim hnah hnuaiah 100-300 vel a bawrin a awm thin a, hetiang Phengphehlep tui/Pangang note hi kan Vaimim hnahah te a awm leh awm loh ngun taka en thlithlai thin tur a ni a. Phengphehlep tui kan hmu anih chuan tihchhiat vek tur anih thu a sawi.

Vaimim enkawl dan tur tarlangin Vaimim-in hnah pali emaw panga emaw a chhuah hunlai hi Pangang tihrem awlsam hunlai tak anih avangin theihtawpchhuah a ngaih thu a sawi a. Vaimim zikah Pangang a awm anih chuan a kung atanga zuta hmeh hlum tur a ni a. Lei/Vut dip al Vaimim zikah phul thin tur a ni. Vaimim kungin khup a thlen atanga a puitlin thleng vut al leh lei dur chawhpawlh a zika phul emaw tui telhin a zika thlawr tur a ni a. Pangang thahna damdawi Emamectin Benzoate 40% hi FAW Pangang thah nan hman tlanglawn ber a ni a. Emamectin Benzoate 10 gms hi tui 25 litres a telha Vaimim zikah kah luh emaw thlawr tur a ni. Vaimim-in chhawn a thlak hnuah chuan Pangang buaipui hi a sawt lutuk tawh loh thu sawiin a eichhiat tur ang ang a chhiat tawh avangin Damdawia kah tawh loh mai a that zawk thu sawiin a Phengphehlep mana tan lak zawk tur a nih thu a sawi bawk.

Pi Vanlalhriati chuan FAW thahna damdawi kan hmanin kut leh hmaite uluk taka tuam tur a ni a. He damdawi khawih chhung chuan a damdawi ei palh a hlauhawm avangin zuk leh hmuam laka insum a that thu a sawi a. FAW thahna hlo kan hmang anih chuan Vaimim ni kher lo, lo/leipuia thlai dangte pawh Ni 15 hnuah chauh ei tur a nih thu a sawi. Pangang ral/thattu rannung an awm a, chung rannungte chu Pangang thahna damdawi kan hman hian a thah tel thin avangin a theih hram chuan damdawi hmang lova Pangang hi tihrem tum hram hram tur a ni tiin Pangang (FAW) leh rannung dang thlai tichhetu kan hmu anih chuan a rang thei ang bera Agriculture Department-a Report turin kalkhawmte a chah bawk.

He hunah hian Mamit khawpui chhunga VC 6 te hnenah FAW thahna hlo leh Sazu tur sem niin Mamit District chhunga Block Agriculture Office awmna Zawlnuam, Reiek leh W. Phaileng-a sem tur pekchhuah nghal a ni a. FAW avanga harsatna neite'n mahni hnaih ber Agriculture Office-ah a thlawnin a thahna hlo te hi a lak theih dawn a ni.

He hunah hian Mamit khawpui chhunga khawtlang hruaitute leh kuthnathawktute an tel tha hle a ni.