Vawiin khan Chhimveng YMA Hall, Mamitah State Institute of Rural Development & Panchayati Raj (SIRD&PR) leh Deputy Commissioner, Mamit District bultumin Mamit District chhunga Village Council-te tan Conference -Cum- Panchayat Sammelan neih a ni a. Pu John Rotluangliana, Hon'ble Minister, FCS & CA, Transport, Tourism, bialtu MLA ni bawk chu khuallian niin Pu Lalrobiaka, Hon'ble MLA, ZIDCO Chairman ni bawk chu khualzahawm a ni.

Khuallian chuan thu sawiin VC te chuan ram leh khawtlangah mawhphurhna sang tak an nei a ni tiin Sorkar tha nei tur chuan VC tha leh rinawm neih a pawimawh a ni a ti. VC Member-te thawhhona tha leh tha lo kar a hla hle a, mipuite nena inhne hnai ber an nih avangin lungrual taka khawtlang tana an thawhho loh chuan khawtlang a lungrual thei lo a ni a ti bawk. Sawrkarin Zoram mipuite tan nasa takin hna a thawk a, chu chu VC te'n kan bawhzui tur a ni a. Sorkar atanga hamthatna dawn theih hrang hrang awm thinah pawh mahni vua leh vang leh chhungte duhsak bik lova, rualkhai taka thlang thin turin a chah. Khawtlang tan nasa zawka tan la tura chahin Training hlawkthlak taka hmang tur leh an Training chu mahni khawtlang theuhah hmang tangkai a, inrintawkna hawn ngei turin a chah bawk.

Khualzahawm, Pu Lalrobiaka, MLA pawhin thu sawiin VC te chu ram neitu dik tak an nih avanga an pawimawhna hre thar tura chahin mipuite'n ring ngam takin khawtlang hruai hna thawk turin an thlang che u a, rinawmna nen rintlak takin awm ngei ang che u a ti. VC an nih laia an hming an chher theih nan tun hun hi hun pawimawh tak a nih thu sawiin hnatlan nikhua leh NREGS-ah pawh VC te'n nasa zawka kan uap a tul a ni a ti. IAY, PMAY leh Sorkar atanga hamthatna dawn theih awm thin pawh Kristian kan nih ang ngeia a mamawhte hnen thlentir hi a Kristian zia a ni a ti bawk. VC te chu khawtlanga an pawimawhzia inhria a, nun vawng uluk tur leh mipuite entawntlaka awm turin a chah bawk.

Vawiin Programme-ah hian Pu Jacob Lalawmpuia, Addl.DC, Mamit District kaihhruainain Mamit District chhunga VC thawk tha, tehkhawng hrang hrang hmanga teh hnua khaw 3 thlanchhuah te chu lawmman hlanna neih a ni a. Chung VC tha thlan chhuahte chu :

1. Tuidam Village Council

2. Saithah Village Council

3. Lungphun Village Council- te an ni a. Hei bakah hian khuallian hian Industries Department hnuaia Carpentry Trade atangin NLUP mi 2 hnenah cheng Nuaikhat leh Sangnga ve ve a hlan bawk.

Vawiin Programme hi Pi Lalbiaksangi, District Bawrhsap-in a kaihruai a. Kalkhawm zawng zawngte'n Faina lam kawnga hmala tura intiamna (Pledge) neiin Pi Maria CT Zuali, Director, SIRD&PR chuan kalkhawmte hnena lawmthusawina a nei bawk.

Chawhnu lamah Training neih chhunzawm a ni a. VC leh PRI khaikhinna chungchangah Pu K.T Pakhuangte, Senior Core Faculty, SIRD&PR chuan zirtirna pe in Swachh Bharat Mission chungchang Pu Peter Lalmuanzova, Coordinator SBM, PHED, Mamit in zirtirna a pe a. Human Rights chungchangah Pi Gracy L.Bawihtlung, CJM, District Court, Mamit chuan zirtirna a pe bawk.

He Village Council Conference Cum Panchayat Sammelan hmang tur hian Mamit District chhunga Village Council hrang hrang atangin an tel tha hle a. Naktuk 31st January, 2018 thleng a awh ang.