Vawiin chawhnu khan Chief Minister Pu Lal Thanhawla chuan New Serchhipah private hospital thar, Mercy Hospital( Rural Diagnostic & Research Centre)  chu a hawng.

Chief Minister Pu Lal Thanhawla  chuan state thanglai Mizoram tan Hospital tamtak din a harsat laia mi tlawmngaite rawn penchhuakin mipui rawngbawlna a ngaiin Hospital an rawn din zel chu malsawmna a ni a ti a. Damlo enkawlna mai ni lo, natna zirchianna atan te thlenga Mercy Hospital in hmalak a tum chu tha a tih thu a sawi a. Tunhnaiah rannung seh avanga natna bakah TB (Ngawr) natna te a lo pung leh ta te chu a bulthum ah zirchian theih ni se a lawmawm hle ang a ti a. Mizoram in a mamawh chu damlohna avanga phai pana inenkawl ngai lo in state chhungah damdawiin tha awm ve se tih a nih thu a sawi a. Private Hospital ten hma an sawn viau chuan sawrkar hospital te pawhin tanlak nachang an hriat a ngai ang a ti.

Hriselna (Healthcare) chu India ram pum mamawh leh chona lianber pawh a nih tel thu a sawi. Vaihlo zuk leh hmuam hman nasat ei leh ina fimkhurlohna avangin Mizoram chu a chhunga mihring cheng zata chhut chuan state hrisello ber a tih theih chu a vanduai thlak hle a ni a ti a. “Min ti baltu, min ti rimchhetu leh min ti hrisellotu vaihlo hi drug a ni tih kan hriat a ngai a, Chinai hi mihring ei atana siam a ni lo a ni”, a ti. Hriselloh avangin Mizoram sawrkar sum a hek tih a sawi a.  Kum tin sawrkar hnathawkte Damdawi in Bill chu Cheng vaibelchhe sawmriat atanga za thleng te a nih ziah avangin Mizoram Budget a sum hmun thuma thena hmun khat dawn chu sawrkar hnathawk leh an chhungte damdawiin senso ah hman ral ziah a ni a ti. Chief Minister chuan nitin  amah rawn dawrtute zinga tam zawk chu mi khawsak harsa tak tak RSBY a inziahna chang hre si lo te an nih thu a sawi a. VC leh LC ten heng mi harsa zawkte hi Central sawrkarin a tanpui theih nan RSBY kawhhmuh turin  tanlak ni se a tha hle ang a ti.

 Ram kalsiam ruhrel tam tak sawrkarin a siam mek leh a ranglam a tihhlawhtlin tum zingah Medical College pawh a tel thu a sawi a. Nakumah chuan college kalpui theih beisei a nih thu sawiin hmalak belh tur leh sen belh tur pawh a tam tham hle a ni a ti. Mahni hna a thahnem ngailo leh sawrkar in hlawh a pek phua thawklo sawrkar hnathawkte an hnawksak tih a sawi a. Damdawiina thawk zingah pawh chutiang mi chu an tel thu leh private hospital aia an mahni pan hram hram tu mi rethei zawk te  an lo dawnsawn danah pawh thil mawilo hriat a ngai fo chu siam that ni se a lawmawm hle ang a ti. Sawrkar Hospital hnathawkte inthlahdah avang ni ngeia puh theih tura  thu hriat nuamlo leh thil vanduaithlak a awm fo chu enfiah ni se a duh thu a sawi a. Hospital din tawh zingah damlote vanduaina denchhena sum siam tum an awm thin tih sawiin chutiang mi chu Mizoram in a mamawh lo a ni a ti.  Damlote duat taka enkawltu leh hmangaihtu hospital te Mizoram in a mamawh ber a ni a ti a. Sumdawnna rilru pua hospital din, damlo suma in chhek lian leh damlo te harsatna hrethiamlo  chu an referral nihna hlihsak zel a ni ang a ti a. “An enkawl dam theih si loh sum duh vanga an hospital a rei tak  damlo kawl chingte pawh an awm tih sawi a ni a, chung mi te chuan a thil tih ah zahna chang hria se a tha hle ang”, tih a sawi a. Sawrkar damdawiin a chinfel theih sum um vanga Private Clinic a in refer le hang chi te pawh sim tel ni se a tha hle ang a ti.

Mercy Hospital hi Pu PC Lalnunpuia leh Dr.Lalrinchhana Pachuau ten inthuruala an din a ni a. An ni pahnih leh Resident Doctor Dr Laldingngheti te bakah Mercy Hospital-ah hian thawktu mi 30 : Staff Nurse 8, Female Attendant 4, Grade IV 4, Driver 2, Cashier 2, Accountant 2, Shopkeeper 1, Radiologist 2, Lab Technician 2, Receiptionist 2 leh Pharmacist 1 te an awm a ni. Puanzarna nena thuam khum 20, Cabin Room TV chhawm 4, Inzaina Pindan (Operation Theatre), Backup ICU, Nauneihna Pindan, Patho & Bio Chem Laboratory, UltraSound, Digital XRay  leh Maternity Ward Khum 3 awmna te Mercy Hospital-ah hian siam a ni bawk a ni. Nikum November ni 27 atang khan Mercy Hospital hi a takin hman tan a ni a. Tun thlengin OPD-ah mi 618 an inentir tawh a, mi 244 Casualty ah an lut tawh a, mi 21 hlawhtling taka zai an ni tawh a, damlo 87 enkawl an ni tawh a ni.