Khawvel hmundangte rualin vawiin khan World Consumer's Rights Day 2019 chu I&PR Conference Hall, Mamit-ah hman a ni a, Dr Lalrozama IAS, District Bawrhsap chuan khuallian niin a hmanpui.

He hun hmanpuitu Dr Lalrozama chuan World Consumer's Right Day hmang tura helama mi pawimawh chin an kal khawm chu lawmawm a tih thu a sawi a, mi tupawh mai hi kan awmna hmuna zirin consumer emaw provider nihna dinhmun nei vek kan ni a, mahni mihring puite laka hleihlenna rilru emaw, thamna, diklo taka thiltih duhna neilo tura hma kan lak a pawimawh thu a sawi. Mamit District tan hmalam hunah hruaitu tha tak takte nen kan dikna chanvo humhalh zel tura hmalak chhoh zel tum a ni a ti.

District Bawrhsap hian Rinawmna tih thupui chu kan lam zin ang huin kan nunpui tawk em tih kan in enfiah a tulthu sawiin Kan Pathian chuan mi rinawmte mal a sawm thin a, diklo taka hlawkna kan hmu emaw kan tihte chu holam taka kan hmanral leh mai mai a ngai fo thin a ni a ti bawk. Chuvang chuan in mamawh tawn vek kan nihna hrerenga  rinawm taka kan thil lei leh hralhah midangte tana malsawmna ni vek turin kalkhawmte a chah a ni.

He hun hi Pu F.L Rinngheta, President Mamit District Consumer Organisation ( MDCO) , Mamit chuan a kaihruaia, Pu MS Dawngliana Hnamte, Secretary MDCO chuan Vawiin Consumer's Right Day thupui "Trusted Smart Product" tih thupui hmanga thusawiin Consumer leh Provider te chanvo bakah khawvela Consumer's Right Day kalpui a nih chhohdan kimchang takin a tarlang a, Kalkhawmte atangin zawhna leh chhanna hun hman a ni bawk.

World Consumer's Right Day 2019 hmanna hunah hian DCSO, Mamit, DIPRO Mamit, khawpui chhung leh a chhehvela Retailer te bakah Mizofed Ltd aiawhte, Khawtlang hruaitute leh MUP aiawhte an tel  a ni.