Sorkar laipuia Ministry of Statistics & Programme Implementation (MoSPI) leh Mizoram sorkara Department of Economics & Statistcis tangkawp chuan vawiin khan Aizawl-ah ‘Regional Conference-cum-Workshop on State Index of Industrial Production (IIP) for North East Region’ a buatsaih a. He hmarchhak biala state 8 huapa Regional Conference-ah hian Nagaland tih lovah chuan hmarchhak state dang 7 - Meghalaya, Sikkim, Manipur, Assam, Tripura, Arunachal Pradesh leh Mizoram atangin palai an kal kim vek a ni. Mizoram-in he Conference ang hi a thlen vawi khatnaah hian MoSPI aiawhin Pi G.S.Lakshmi, Addl. Director General, MoSPI; Pu Saumya Chakraborty, Dy. Director General, IS Wing, Kolkata leh Pu Rajesh Kumar Sharma, Director, Economic Statistic Division, Central Statistic Office, New Delhi te an rawn tel thei a. He Regional Conference-ah hian Mizoram sorkar aiawhin Planning Secretary Dr.C.Vanlalramsanga leh Director, Economics & Statistics Pu Lalchhuanawma Hrahsel ten an telpui thei bawk a ni.

Regional Conference-cum-Workshop hawnna inkhawmah Pu Rajesh Kumar Sharma, Director, Economic Statistic Division, Central Statistic Office, New Delhi chuan Conference chhimtu zawng zawngte lawmna thu a sawi a, a thlengtu Mizoram sorkar chungah lawmthu a sawi bawk. Rampuma economic statistics kimchang tak neih tur chuan state tinah Index of Industrial Production (IIP) survey neih a pawimawh em em a, hei hian sorkar tan hmasawnna kalpui zel dan tur leh state tina planning ruahmanna an siam tur atan nasa takin a pui thei bawk a ni a ti a. He hmarchhak Conference-ah rampum Industrial Survey neih meka a hotupa ber Pu Saumya Chakraborty, Dy. Director General, IS Wing, Kolkata pawh a rawn tel thei chu a vanneihthlak hle a ni a ti bawk.

Mizoram Planning Secretary Dr.C.Vanlalramsanga pawhin thusawiin hmarchhak huap IIP Conference chu Mizoramah thlen phalsak an nih vangin Ministry of Statistics & Programme Implementation chungah lawmthu a sawi a. Mizoramah State Index of Industrial Production (IIP) ground survey chu Economics & Statistics Department kutah dah niin chak takin hma an lakna zarah tun thla March ni 6 khan zawhfel thawkhat tawh a nih thu a sawi bawk a. Hetiang Survey pawimawh hrang hrang hian sorkar tan pawhin ram hmasawnna atana ruahmanna siam hnaah nasa takin a pui a ni a ti. Chu bakah GDP pun dan zirchian a nih chuan engtinnge a pun a, industrial contribution engzat tak nge awm tihte hriatchian theih a ni a, hei hian state sorkar chu nasa takin a puih mai bakah investment rawn siam duh ramdangte leh sumdawng liante a hip thei a ni a ti. Vawiina regional conference-a sawihona chuan hmarchhak biala ‘business cycle’ a tichiang viau thei tura a beisei thu sawiin chu chuan hmarchhak state-ahte pawnlam investment pawh a tisang ngei a beisei thu a sawi a ni. Nikumah Mizoram-ah sum dehchhuak thei tur industry hrang hrang awm theite (industrial potential) leh sumdawnna lama investor-te hip turin business summit ‘Magnetic Mizoram’ neih a ni a, chuta rampawn embassy aiawh lo kalte pawhin Mizoramin IIP leh Survey report dangte a lo la nei loh avangin an tum angin hmalak zel harsa an ti a; tunah chuan sorkar laipui tanpuina nen Mizoram pawhin IIP bakah Survey pawimawh tak tak hmangin statistics kimchang zawk a nei thei dawn tak avangin a lawmawm takzet a ni a ti.

Pi G.S.Lakshmi, Addl. Director General, MoSPI pawhin thu sawiin hmarchhak state-te chu a hma zawngin hetiang Conference nei turin Kolkata-ah kohthlak an ni thin a, amaherawhchu hmarchhak state-te tan hmarchhak bialchhungah ngei Regional Conference buatsaih ni thei se tih sorkar laipuiin a rel angin nikumah a hmasa ber atan Shillong, Meghalaya-ah neih a ni phawt a, kuminah Mizoram-ah a vawi khatna atan nghah a ni leh thei ta chu a lawmawm hle a ni a ti. India hmarchhak bial chu investment atan duhthusam a ni a, Industrial Survey leh Surver pawimawh dangte hmanga zirchiana statistics leh data kimchang zawk neih hunah chuan nasa zawkin helai hmunah hmasawnna tur kawng a rawn inhawng dawn a ni a ti bawk. Pi Lakshmi chuan ‘local industrial growth survey’ a pawimawh thu sawiin heng survey hrang hrang kalpui mekah Ministry chuan engtiklai pawhin anmahni tanpui leh thurawn pe turin a inhuam reng a ni tih state palaite a hrilh bawk.

Pu Saumya Chakraborty, Dy. Director General, IS Wing, Kolkata chuan Economics & Statistics Department hmalakna fakin Mizoram survey hnathawh mekah a hranpain Ministry atangin mithiam zawkte tirh theih ni lo chung pawha Department official leh staff-ten felfai takin survey an kalpui thei chu a entawntlak hle a ni a ti a.  Northeast state zingah chuan Mizoram-in a tichak ber a ni a ti bawk. Industry, a bik takin manufacturing lam chuan employment a tipiang tam thei ber a, chuvangin manufacturing industry neih tam lamah tanlak a ngaih thu a sawi bawk.

He ni khawt awh ‘Regional Conference-cum-Workshop on State Index of Industrial Production (IIP) for North East Region’ hi Hotel Regency Conference Hall, Zakawt-ah neih a ni.